Siglir tar il cuntegn

Header

cuntegn

Situaziun s'agravescha Interpresas betg necessarias per vita ston serrar en Italia

L'Italia serra en il cumbat encunter il coronavirus tuttas producziuns che n'èn betg necessarias per la vita, fin almain ils 3 d'avrigl. Butias da mangiativas, la posta, bancas ed apotecas restian avertas ed era il traffic public circuleschia vinavant. Quai ha declerà il primminister Giuseppe Conte.

Igl è la pli greva crisa per il pajais, dapi la segunda guerra mundiala
Autur: Giuseppe Conte Primminister da l'Italia

Tuttas lavurs productivas che n'èn betg absolutamain necessarias per garantir il provediment cun bains u servetschs essenzials, vegnan terminadas. L'Italia vala sco terz gronda economia publica en la zona da l'euro.

Prest 800 morts en in di

Il pajais ha annunzià sonda, en be in soli di, prest 800 morts, tants sco anc mai dapi ch'il virus sa derasa en il pajais. Morts èn fin uss 4'825 persunas, ha communitgà la protecziun civila a Roma, quai èn 793 dapli ch'il di avant. Pertutgada fitg ferm è la Lombardia en il nord dal pajais, nua ch'il virus è rut ora la fin favrer ed ils ospitals stattan curt avant il collaps. Las consequenzas economicas per il pajais ch'è profundamain en daivets èn gia uss immensas.

L'Italia è mundialmain il pajais cun ils pli blers mortoris uffizials pervi dal virus. Perquai ha la regenza anc ina giada rinforzà venderdi il scumond da sortida, che vala gia dapi ils 10 da mars.

Il dumber da morts en l'Italia è fitg aut cumpareglià cun il dumber uffizial da las novas infecziuns. Quel è creschì sin 53'578 persunas, danovamain millis dapli ch'il di avant.

Auta mortalitad

Anc betg cler è la raschun per l'aut dumber da mortoris. I pudess dar pliras raschuns: L'Italia ha ina da las pli veglias populaziuns dal mund – ed ils blers morts èn persunas pli veglias ch'eran gia flaivlentadas d'autras malsognas. Blers tats e tattas vivan en Italia ensemen cun lur uffants e lur beadias e beadis en ina chasa. Entras quai èsi pli simpel da s'infectar.

Experts partan er dal fatg ch'il dumber zuppà d'infectads è bler pli aut ch'inditgà, blers cas miaivels u che passan senza sintoms, na vegnan betg tschiffads. Entras quai datti ina rata da mortoris pli auta.

Ord l'archiv da SRF:

video
Italia ha entant dapli morts pervi dal coronavirus che la China
Or da Tagesschau dals 20.03.2020.
laschar ir. Durada: 2 minutas 49 Secundas.

RTR novitads 06:00

Artitgels legids il pli savens