Siglir tar il cuntegn
Inhalt

Svizra Sistem da defensiun cunter aviuns sut la marella

Il project per in nov sistem da defensiun cunter aviuns (BODLUV) è actualmain franà. Avant curt aveva il minister da defensiun Guy Parmelin sistì il project. Uss duai quai dar in’inquisiziun administrativa per evaluar propostas da meglieraziun. L'inquisiziun duai far in expert extern ed independent.

Actualmain è il project per la cumpra d'in nov sistem da defensiun cunter aviuns franà.
Legenda: Nagin moviment: Actualmain è il project per la cumpra d'in nov sistem da defensiun cunter aviuns franà. Keystone

Il minister da defensiun Guy Parmelin vul in'inquisiziun administrativa dal project franà per in nov sistem da defensiun cunter aviuns. L'inquisiziun duai far in expert extern ed independent. Uschia conferma il Departament da defensiun in rapport da la gasetta «Tages-Anzeiger».

L’emprim evaluar – suenter cuntinuar

L'inquisiziun na sa drizzia dentant betg cunter persunas specificas. I va per sclerir ils fatgs e per elavurar propostas per meglierar ils process existents. Examinads duain vegnir structuras, proceduras e controllas.

Avant curt aveva Parmelin sistì il project BODLUV. L'emprim vul el ina survista da l'entira defensiun da l'aria e cunzunt in rapport davart la cumpra d'in nov aviun da cumbat. Pir lura possia il project cuntinuar, scriva il Departament da defensiun.

Remplazzar il sistem da defensiun cunter aviuns

La fin da favrer aveva il Cussegl federal lantschà las preparativas per l’evaluaziun da la cumpra d’in nov aviun da cumbat. Ina gruppa da lavur duai tranter auter evaluar, quant ditg ch’ils aviuns ch’èn oz en funcziun duain anc sgular.

Il project BODLUV 2020 (BODengestützte LUft-Verteidigung 2020) sa fatschenta cun il remplazzament dal sistem da defensiun cunter aviuns aifer ils proxims onns. Il pensum da la defensiun cunter aviuns è proteger objects civils e militars cunter privels ord l’aria.

RR novitads 12:00