En la regiun d'Arolla èn en tut 14 skiunzs stads bloccads la dumengia, suenter ch'ina front da trid'aura als aveva surprendì. Il glindesdi en damaun haja in guardia-chamona alarmà la polizia, che plirs alpinists sajan ordavert en la regiun dal Pigne d’Arolla. Quai communitgescha la polizia chantunala dal Vallais.
Sinaquai han ins instradà ina grond'acziun da salvament, tranter auter cun set helicopters. Da las quatter unfrendas han ins chattà ina gia morta al lieu da la disgrazia, las autras trais èn mortas en l’ospital. Tschintg da las ulteriuras persunas salvadas, èn actualmain en in stadi critic.
Duas ulteriuras unfrendas en il Vallais
In ulteriur drama hai dà en ils culms tranter il Vallais e Berna. Al Mönch han ins chattà il glindesdi las baras da dus alpinists giuvens, sco la polizia bernaisa annunzia. Quels valevan sco sparids dapi la dumengia saira. Pervi da l'aura trida èn las stentas da chattar ils dus umens stadas fitg difficilas.
Tar las unfrendas sa tracti d'in um da 21 onns dal chantun Berna, e d'in um da 22 onns dal chantun Basilea-Champagna.
RR novitads 18:00