Siglir tar il cuntegn
Inhalt

Svizra Sis dals novs trens da la SBB survegnan ina disposiziun

Sis dals novs trens da duas auzadas da la Viafier federala dastgan a partir dals 26 da favrer vegnir duvrads per il traffic regular. Quai grazia ad ina disposiziun intermediara.

Tren.
Legenda: Sis dals novs trens dastgan tiers las reproschas charrar – per interim. Keystone

Ils novs trens da la Viafier federala charran en il traffic regular. Tenor ina disposiziun intermediara vala quai dentant mo per sis dals novs trens sin duas auzadas. Il tribunal argumentescha che las mesiras preventivas pudessan sa mussar sco betg necessarias e chaschunar in donn finanzial tar la SBB.

L'organisaziun per persunas cun impediment Inclusion Handycap è sa declerada d'accord cun la disposiziun. Il schaner aveva I'organisaziun tetgala per persunas cun impediment purtà plant tar il tribunal administrativ federal. Cun l'argument che persunas cun impediment che viageschan senza accumpagnader fruntian sin blers obstachels.

Mo la disposiziun per sis trens

Sche la SBB sto quintar cun in retard tar l'introducziun dals ulteriurs trens n'ha il tribunal anc betg decidì. La Viafier federala argumentescha però ch'ella saja dependenta da 25 trens per pudair augmentar il traffic plaun a plaun suenter la fasa da test che va a fin il december.

SBB sa mussa cooperativa

La Viafier federala è cuntenta cun la decisiun è vul metter en funcziun ils novs trens. Uschia vesan ins sch'ils trens sajan adattads per il mintgadi, avant ch'ins integreschia els tar la midada da l'urari cumplettamain en l'urari.

La SBB sa mussa però cooperativa envers la Inclusion Handicap e vul eliminar l'in u l'auter punct che vegn crititgà da l'organisaziun facultativmain.

Maclas

En tut discurran ins da 15 maclas. Tranter auter crititgescha l'organisaziun per persunas cun impediment che las rampas dal tren sin il perrun sajan uschè taissas che persunas en la sutga da rodas na possian betg sortir senza agid.

RR novitads 12:00