Siglir tar il cuntegn
cuntegn

Svizra Sin via directa al diplom

90% da las persunas ch'emprendan termineschan ina scolaziun suenter la scola obligatorica entaifer tschintg onns. Trais quarts fan quai sin via directa. Quai mussan las cifras da l'Uffizi federal per statistica.

Giuvenil vid bajegiar in mir da ziaghels.
Legenda: Be 10% che fan suenter la scola obligatorica in'ulteriura scolaziun na terminescha betg quella entaifer tschintg onns. Keystone

Dunnas, giuvenils svizzers ed uffants d'academichers vegnan il pli tgunsch a la finamira. 10% han bittà la fautsch en il chanvà u eran suenter tschintg onns anc senza diplom. Dals 90% ch'han in diplom tschintg onns suenter ch'els han absolvì la scola obligatorica, han trais quarts fatg quai sin via directa. In quart ha pia stuì repeter, èn s'orientads auter ni han rut giu la scolaziun.

Il pli savens han scolars dal gimnasi absolvì in diplom entaifer tschintg onns, numnadamain 94%. Silsuenter suondan ils emprendists: 89% dad els han retschavì entaifer quest temp l'attestat da qualificaziun. In zic pli paucs (86%) han fatg cun success entaifer tschintg onns ina scolaziun ad ina scola media spezialisada u attest federal professiunal (84%).

Dunnas han cleras miras

92% da las dunnas han cuntanschì in diplom entaifer tschintg onns suenter la scola obligatori. Tar ils umens èn quai be 87%. Plinavant èn las dunnas en media er pli spert: 77% da las dunnas han fatg quai sin via directa, e tar ils umens èn quai 69%.

La finala ha er la derivanza sociala in effect: Dals scolars u scolaras ch'han il bab u la mamma ch'han in diplom d'ina scola auta, fan 94% ina scolaziun entaifer tschintg onns suenter la scola obligatorica.

RR novitads 14:00