Siglir tar il cuntegn

Svizra Sika cun gudogn da record

Il concern svizzer da chemia da construcziun e colla Sika ha fatg l'onn 2017 in gudogn da record da 649 milliuns francs, uschia communitgescha l'interpresa. Il gudogn da manaschi munta a 896 milliuns francs. Ils motivs per quest gudogn èn tranter auter novas fabricas ed acquisiziuns.

La svieuta dal concern svizzer da chemia da construcziun e collada Sika è creschida il 2017 per 8,9%.
Legenda: La svieuta dal concern svizzer da chemia da construcziun e collada Sika è creschida il 2017 per 8,9%. Keystone

Il gudogn net è cunquai creschi per 14,5% ed il gudogn da manaschi per 12,7%. S'augmentà saja il gudogn da record cunzunt pervia da la dinamica dal svilup sco era pervia d'in management da custs disciplinà, scriva l'interpresa.

Svieuta è creschida per 8,9%

La Sika che ha sin l'entir mund passa 18'400 collavuraturs, ha surpassa cun la svieuta da record da 6,25 milliardas francs las atgnas spetgas sco era quellas dals analists. Tenor indicaziuns da l'interpresa han tuttas regiuns pudì augmentar lur svieuta e schlargiar la quota da participaziun al martgà.

Grazia a l'avertura da nov novas fabricas e cun set novas acquisiziuns, è la svieuta quintada en valuta locala creschida per 8,9%. Spetgà aveva la Sika in creschament da 6 fin 8%.

RR novitads 06:00