Siglir tar il cuntegn

Header

audio
Mezdi: Co van parlamentaris grischuns enturn cun critica?
Or da Actualitad dals 07.07.2017.
laschar ir. Durada: 3 minutas 15 Secundas.
cuntegn

Svizra SHITSTORM – quai na datti betg tar nus! U bain?

Parlamentaris grischuns èn adina puspè confruntads cun chartas anonimas u mails cun accusaziuns. Dentant las reacziuns positivas domineschan.

Sin via u en il tren dettia adina puspè persunas che vegnian a discurrer cun Heinz Brand. Quai sajan ils bels inscunters – per il pli persunas che n'hajan betg da crititgar mabain da ludar. Las reacziuns negativas vegnian lura plitost anonimas e per posta.

Heinz Brand, cusseglier naziunal PPS.
Legenda: Heinz Brand, cusseglier naziunal PPS, Keystone
Mia posta vegn filtrada. Mia dunna è mes filter. Ella sorta mia posta e tut quai ch’è dischagreabel na lascha ella betg vegnir fin tar mai. Uschia na ves jau betg quella posta e poss schanegiar mai.
Autur: Heinz Brand cusseglier naziunal PPS

Heinz Brand survegn mintgatant reacziuns che tangheschan el sco persuna directamain. El vegnia attatgà cun pleds co «nazi» u «traditur da la patria». Questa experientscha fetschian divers commembers da la Partida populara svizra. Dentant era la critica u attatgas sin la persuna na turmentian insumma betg Heinz Brand. Quai sajan tut persunas che n'hajan betg sut controlla lur emoziuns.

La politica vivia dal dialog: tranter politicras e politichers ma era dal dialog tranter il pievel e politichers. Uschia dettia adina puspè reacziuns e quai saja era bun, entant che i giaja per la chaussa e betg per la persuna. Stefan Engler survegnia var 10 fin 12 reacziuns al mais da burgais ch’en cuntents u era betg.

Stefan Engler, cusseglier dals chantuns PCD.
Legenda: Stefan Engler, cusseglier dals chantuns PCD. Keystone
Tgi che na vertescha betg il chaud na duai betg lavurar en cuschina. Il medem vala en la politica: Tgi che na vertescha betg la critica n'è betg al gist lieu en la politica.
Autur: Stefan Engler cusseglier dals chantuns PCD

D'associaziuns ni uniuns dettia mintga di reacziuns. Quai sajan era quels che tramettian lur lobists e guardian precis sin la detta tge ch’insatgi vuschia finalmain, di il cusseglier naziunal da la Partida burgais-democratica, Duri Campell. Da persunas privatas survegnia el var 10 reacziuns al mais.

Duri Campell, cusseglier naziunal PBD.
Legenda: Duri Campell, cusseglier naziunal PBD. Keystone
Sch'in di a mai ch'i fiss da dar schleppas a mai ni che jau saja in idiot, lura hai jau plitost cumpassiun cun quels.
Autur: Duri Campell cusseglier naziunal PBD

Blers sajan engraziaivels per quai ch’ins fetschia e las reacziuns vegnian era da cor. I dettia dentant era blers che scrivian ch'els na sajan betg da la medema opiniun sco el. E quai saja era dal tuttafatg giustifitgà. I dependia però dal tun dal mail ni da la charta sch'el dettia resposta ni betg. «Ma ina curta resposta survegn bunamain mintgin», di Duri Campell.

La gronda part da las reacziuns sajan positivas tar tut ils parlamentaris grischuns. Uschia era tar Silva Semadeni. Divers fetschian era cumpliments ad ella. I saja bun sch'insatgi haja il curaschi dad ir cunter il current. Tals cumpliments fan plaschair a Silva Semadeni. Però era tar ella dettia l’autra vart. Sch'insatgi dia simplamain sia opiniun na saja quai betg in problem. Tar in problem vegnia pir cura ch'i giaja cunter la persuna.

Silva Semadeni, cussegliera naziunala PS.
Legenda: Silva Semadeni, cussegliera naziunala PS. Keystone
Ins vesa adina puspè ch'i dat persunas primitivas che n'acceptan betg che la democrazia viva da pliras partidas, da pliras vuschs e ch'i dovra la confruntaziun da las differentas opiniuns.
Autur: Silva Semadeni cussegliera naziunala PS

Sch'insatgi dia per exempel ch’ella na saja betg abla d'esser ina represchentanta dal pievel ni umens che dian ch'ina dunna na saja betg abla. Però lura sa regordia ella adina puspè dals resultats da las elecziuns. E cun il temp survegnian ins en la politica ina pel d’elefant, uschia Silva Semadeni cun in surrir.

Las reacziuns vegnian adina damain cun il temp, manegia il cusseglier naziunal Martin Candinas. Quai pudess avair da far cun quai che la glieud s'endisia vi da las opiniuns e vi da las persunas sin il palc politic. Dentant dependia quai era adina dal tema. Sch’ins discuttia per exempel en l’arena vegnian bleras reacziuns – oravant tut negativas.

Martin Candinas, cusseglier naziunal PCD.
Legenda: Martin Candinas, cusseglier naziunal PCD. Keystone
Per part è quai schon brutal tge che vegn scrit sur dad ins en ils forums da commentaris online. Dentant quai ma lascha fraid. Perquai che quels forums vegnan per il pli surduvrads da persunas che dovran in ventil per laschar ora lur frustraziun.
Autur: Martin Candinas cusseglier naziunal PCD

Cunquai ch’ins vegnia or d'ina regiun muntagnarda vegnian ins savens confruntà cun quai. Tschertins dian ch'ins n'haja nagina idea dal mund, uschia Martin Candinas. «Ma sch’ins parta ora ston ins era esser pronts d'incassar».

I dettia era adina puspè persunas che scrivian in nausch mail encunter ina persuna e tramettian quel a tut ils parlamentaris. Però quels mails na possian ins betg propi prender serius.

Martin Schmid, cusseglier naziunal PLD.
Legenda: Martin Schmid, cusseglier naziunal PLD. Keystone
En il parlament hai jau in toc pli paucas reacziuns negativas che quai che jau aveva en la regenza grischuna.
Autur: Martin Schmid cusseglier dals chantuns PLD

Mails sajan scrits talamain svelt e per il pli or da l’affect. Il bun saja ch'i sajan gist uschè svelt puspè stizzads.

Las reacziuns na sajan tar nagin stadas talmain fermas ch’ins haja studegià dad ir avant dretgira. Tut ils parlamentaris grischuns èn dal medem avis: Sch’ins saja persvas da quai ch’ins fetschia, lura saja quai era pli simpel d'ir enturn cun la critica.

RR actualitad 12:00

Artitgels legids il pli savens