Siglir tar il cuntegn

Svizra Sgular incognito è pussaivel

Oz pon ins cumprar in sgol online ed er da far il check-in cumandaivlamain da chasa anora. Sin la plazza aviatica ston ins mo pli dar giu la bagascha ed ir atras la controlla da segirtad. Quai spargna temp ed er gnerva. Ma dovr'ins uschia anc la carta d' identitad ed il pass?

controlla da segirtad silla plazza aviatica da Turitg
Legenda: Malgrà ch' ins na sto betg pli mussar la carta d' identitad en il spazi da Schengen, ston tuttina tuts ir tras la controlla da segirtad. Keystone

Ozendi èsi tut tenor propi pussaivel da sgular senza carta d' identitad u pass. Quai conferma er Michael Stief, il pledader da medias da la plazza aviatica da Turitg.

«Sch'ins cumpra il ticket per il sgol online e fa era il check-in online e sgola entaifer il spazi da Schengen, lura na ston ins betg pli s'identifitgar», declera el. Ina persuna ch'entra en il spazi da Schengen - che sgola per exempel da l' America en Svizra - sto dentant pudair s'identifitgar.

Emprovas da controlla tuttina pussaivel

Sch' ins na sto betg pli s'identifitgar tar sgols en il spazi da Schengen, èsi lura er pussaivel d'engular in'autr'identitad e sgular cun quella?

Quai saja uschia, di William Agius, docent per communicaziun eronautica dalla scol'auta per scienzas applicadas da Turitg (ZHAW). Tuttina po quai dentant vegnir tar emprovas da controlla, tar las qualas i vegn cumpareglià la carta da bord cun la carta d' identitad.

N'è quai pia betg malsegir sch'ins po sgular incognito? Er sch'ins vegnia da sgular cun in'identitad engulada, stoppian ins tuttina ir atras la controlla da segirtad sin la plazza aviatica, nua che la bagascha vegnia examinada, uschia Agius.