Siglir tar il cuntegn

Header

Parlamentaris en la sala dal Cussegl naziunal.
Legenda: Durant trais dis s'inscuntra il Cussegl naziunal ad ina sessiun extraordinaria. Keystone
cuntegn

Sessiun extraordinaria a Berna Cussegl naziunal vul midar las reglas per donaziuns d'organs

Da glindesdi enfin mesemna s'inscuntra il Cussegl naziunal ad ina sessiun extraordinaria. Discutà vegn tranter auter davart il pretsch da zutger, donaziun d'organs, l'evaluaziun da telefonins da requirents d'asil e la controlla da las assicuranzas. Qua datti las previstas e las decisiuns.

Per augmentar il dumber da donaziuns d'organs

L‘ultim di da la sessiun speziala è il Cussegl naziunal lura anc sa fatschentà cun l’iniziativa per donaziuns d’organs. Quella vul metter sin il chau il sistem actual. Oz sto mintga persuna declerar avant la mort ch’ella è d’accord da dar ses organs. Tar in Gea a l’iniziativa fissan tuttas e tuts automaticamain donaturs. Tgi che na vul betg metter a disposiziun ses organs suenter sia mort, sto lura declerar quai explicitamain en in register. Il Cussegl naziunal propona d'acceptar questa iniziativa.

Il Cussegl federal sustegn l’idea da l’iniziativa, vul dentant dar als confamigliars la pussaivladad da decider en cas da dubi. El ha perquai preschentà ina midada da la lescha correspundenta. Il Cussegl naziunal ha sustegnì la cuntraproposta dal Cussegl federal cun 150 cunter 34 vuschs e quatter abstenziuns. Ils iniziants han gia annunzia, ch’els fissan pronts da retrair lur iniziativa, sche la cuntraproposta vegniss acceptada.

Sco proxim sa fatschenta il Cussegl dals chantuns cun la tematica.

Analisa pli profunda da la DNA

Sclerir crims grevs duai vegnir pli simpel en Svizra. Quai ha decis il Cussegl naziunal. Concret duaja esser lubì dad betg mo eruir la schlattaina, mabain er la chalur dals egls, la vegliadetgna u l’etnia d’ina persuna sin basa da fastizs da DNA. Quests tratgs caracteristics possian furnir a la polizia indizis custaivels tar las investigaziuns – ha argumentà ina maioritad da la Chombra gronda.

Sco proxim debattescha il Cussegl dals chantuns davart la midada da lescha.

Dazi d'import sin zutger

La producziun da zutger svizra duai vegnir protegida vinavant da imports da zutger ord l’exteriur. Quai ha il Cussegl naziunal decis glindesdi cun 117 cunter 66 vuschs. El ha approvà ina iniziativa parlamentara correspundenta.

Sin imports da zutger duai en futur dar in dazi da 70 francs per tonna.La maioritad dals parlamentaris e parlamentarias eran da l'avis che la producziun da zutger indigena fiss uschiglio periclitada. Il medem mument duai però er vegnir promovida la cultivaziun da ravas da zutger ecologicas.

Er sin il program da glindesdi stat la lescha da survegliar las assicuranzas. Concret vul il Cussegl federal che assicuranzas che porschan lur servetschs a tschertas firmas vegnan survegliadas damain. Ultra da quai duain intermediaturs dad assicuranzas stuair infurmar ils clients davart lur provisiuns.

Gea a l'analisa da telefonins da requirents d'asil

Per eruir l'identitad da persunas che dumondan asil en Svizra, duai il Secretariat da stadi per la migraziun dastgar analisar telefonins. Quai dentant mo, sch’i na giaja betg auter. Il Cussegl naziunal ha approvà da midar da lescha. Tenor quella stoppian las persunas che dumondan asil, dentant adina avair l'emprim la pussaivladad da far sezzas indicaziuns davart lur naziunalitad, identitad u ruta. Pir suenter pudess il secretariat eventualmain analisar il telefonin.

Sco proxim s’occupescha il Cussegl dals chantuns cun la fatschenta.

Sessiun extraordinaria

Budgetadas per las debattas èn prest 23 uras. Quest temp dovra la Chombra gronda per vegnir vinavant cun fatschentas impurtantas. Preschents en il Cussegl naziunal vegnan ad esser durant la sessiun extraordinaria il minister d'economia e president da la Confederaziun, Guy Parmelin, il minister da finanzas, Ueli Maurer, la ministra da giustia, Karin Keller-Sutter ed il minister da l'intern, Alain Berset.

RTR novitads 08:00 + / actualitad 12:00

Artitgels legids il pli savens

Scrollar a sanestra Scrollar a dretga