Siglir tar il cuntegn

Header

audio
Sessiun d'atun: Iniziativa da biodiversitad (pro e contra)
Or da Actualitad dals 19.09.2022.
laschar ir. Durada: 4 minutas 18 Secundas.
cuntegn

Sessiun Berna Debatta da biodiversitad en il Cussegl naziunal

Proteger e mantegnair la biodiversitad en Svizra. Quai è la finamira da l'iniziativa «Per il futur da nossa natira e da nossa cuntrada». Per il Cussegl federal va l'iniziativa per la biodiversitad memia lunsch. El renconuscha dentant la necessitad d'agir e presenta perquai ina cuntraproposta.

Nagut auter che nossa basa da viver saja en privel. Da quai è la cussegliera naziunala Sandra Locher-Benguerel persvasa.

Oz èn passa in terz da tut ils animals e da tut las plantas en Svizra sin la glista cotschna. Quai èn signals alarmants. Igl è necessari d’agir.
Autur: Sandra Locher-Benguerel cussegliera naziunala socialdemocratica

La socialdemocrata sustegn perquai l'iniziativa per la biodiversitad. Quella vul obligar la Confederaziun ed ils chantuns da proteger meglier fauna e flora. Ils iniziants, quai èn la Pro Natura e BirdLife Svizra sco era la Lia svizra per la protecziun da la patria e la Fundaziun svizra per la protecziun e la tgira da la cuntrada, pretendan ultra da quai ch'i vegni fatg dapli per proteger la cuntrada ed il patrimoni cultural da la Svizra. I dovria perquai dapli daners ed engaschi da chantuns e Confederaziun ed era dapli terren protegì.

Cumbatter iniziativa cun ina cuntraproposta

Che la protecziun da la natira saja impurtanta e ch'i dovria qua dapli stentas, gliez crai era la cussegliera naziunala liberaldemocratica Anna Giacometti. L'iniziativa na saja dentant betg il dretg instrument per far quai, ella saja perfin memia extrema.

Sch’ins legia il text da l’iniziativa han ins il sentiment ch’els vulan proteger tut. Betg mo quai ch’è en ils territoris da protecziun mo era quai ch’è ordaifer.
Autur: Anna Giacometti cussegliera naziunala liberaldemocratica

Las consequenzas possian esser gravantas. Gist ussa, amez la crisa d'energia stoppian nus era patratgar vid il provediment d'electricitad e l’incumbensa impurtanta che l'agricultura haja per il provediment da Svizras e Svizzers. L'iniziativa pudess qua impedir svilups impurtants e necessaris, di Giacometti. I dovria qua perquai reglas e perscripziuns pli cleras. Ella sustegni perquai era la cuntraproposta indirecta dal Cussegl federal.

Tranter auter duai la surfatscha da basa da l'infrastructura ecologica, sco quai ch'i ha num ella proposta, vegnir augmentada dad oz 13,4 sin 17%. Concret duain biotops, reservats da guaud e territoris da protecziun da muntada naziunala vegnir engrondids. La cumissiun da la chombra gronda ha concretisà quels lieus e vul scriver quels direct en la lescha davart la protecziun da la natira e da la cuntrada.

Pli spert e pli clar

Anna Giacometti è persvadida che la revisiun da la lescha porta la fin finala dapli che da spetgar sin la realisaziun da l'iniziativa. La ristga da far naufragi cun tut saja uschia er pli pitschna.

Sper la populaziun sto era ina maioritad dals chantuns approvar l’iniziativa. Sche l’iniziativa fa naufragi avain nus nagut pli. La cuntraproposta cun la midada da la lescha pon ins gist realisar. Jau crai che quai correspunda era al giavisch dals iniziants da l’iniziativa.
Autur: Anna Giacometti cussegliera naziunala liberaldemocratica

Stritgar ils 17%

Quai conferma Sandra Locher-Benguerel. Ella pudessi era viver cun la cuntraproposta. In punct stoppia il parlament dentant anc stritgar. D’augmentar la surfatscha protegida sin 17%, in augment marginal sco ella di, impedeschi ch'i vegnia propi fatg serius cun la protecziun da la biodiversitad en Svizra.

I na dovra betg ina cifra. Ins sto scriver en la lescha tge ch’è l’intent. E quel è da realisar dapli terren protegì en ils chantuns. E quai realisain nus meglier senza metter ina cifra fixa en la lescha.
Autur: Sandra Locher-Benguerel cussegliera naziunala socialdemocratica

Quai sustegn era Anna Giacometti. En la cumissiun n’ha quella pretensiun dentant betg chattà ina maioritad. Tgi ch'il Cussegl naziunal suonda la fin finala e sch'ils iniziants fissan era pronts da retrair lur l’iniziativa per la biodiversitad mussa la debatta dals proxims dis.

RTR actualitad 12:00

Artitgels legids il pli savens