Siglir tar il cuntegn

Svizra Service public duai star a pèr a la digitalisaziun

La SRG SSR duai er vinavant porscher in servetsch public cumplessiv. Il Cussegl federal na vul betg volver il model vertent, ma adattar quel a las cundiziuns digitalas.

Cussegliera federala Doris Leuthard.
Legenda: La SRG duai svegliar l'interess da la glieud là nua ch'ella s'infurmescha - er en l'internet. Keystone

La SSR duai porscher er en l'avegnir in vast service public. Il Cussegl federal na vul betg metter sin il chau il model existent, ma adattar quel a las relaziuns digitalas.

Il Cussegl federal vul far quai en dus pass:

  1. Il prim vul el far adattaziuns a las novas concessiuns dal 2019.
  2. A vista mesauna vul el sviluppar la lescha vertenta da radio e televisiun ad ina lescha davart medias electronicas – quai en vista a la digitalisaziun ed il diever da medias midà.

Uschia duai il service public er pudair exister cumplettamain be en il mund digital sco purschidas online. Quai possian ins quintar bun u schlet, ha ditg la ministra da communicaziun Doris Leuthard: «Igl è dentant uschia.» Ins stoppia ir per il public giuven là nua ch'el s'infurmeschia.

Las restricziuns actualas davart la reclama duain vegnir mantegnidas. Tenor il Cussegl federal garantescha quai in tschert equiliber visavi las medias privatas.

Infurmaziun sco pitga centrala

La SRG duai en l’avegnir differenziar anc pli cler lur programs e lur purschidas online da cuntegns commerzials. La vastadad e l’aut nivel da las infurmaziuns duain vinavant esser la pitga centrala. Il Cussegl federal stima che la SRG dovra almain la mesadad da las taxas da recepziun per las infurmaziuns.

Deliberar radios locals da mandat da prestaziun

Per radio e televisiun locala duai vul il Cussegl federal relaschar prescripziuns pli precisas ed uschia pretender prestaziuns d’infurmaziun regiunalas. Adattaziuns duai quai era dar tar radio commerzials locals cun concessiun che han oz in mandat da prestaziun publicistic, ma nagin dretg sin sustegn cun taxas.

En il futur na saja quai betg pli giustifitgà da suttametter quests radios ad obligaziuns statalas. La stgarsezza da frequenzas na saja nagin tema pli. E perquai vul il Cussegl federal er deliberar ils radios commerzials locals da l’obligaziuns da concessiun e dal mandat da prestaziun.

Reacziuns davart il rapport

Verds
Ils Verds crititgeschan ch’il Cussegl federal sa restrenschia en ses rapport sin la defensiun dal status quo. Els pretendan respostas concretas davart las sfidas dal svilup digital. Plinavant pretendan els in partenadi da purschiders da servetsch public naziunals e medias privatas. Plinavant duai il servetsch public regiunal vegnì rinforzà. Plinavant pretendan ils Verds damain reclama ed in organ da surveglianza che saja pli lontana dal stadi che l’UFCOM.


PPSLa Partida populara svizra crititgescha fermamain il rapport, el «trumpescha sin l'entira lingia» e saja in palpiri plain rusnas cun in’optica unilaterala da la SRG. Tenor la PPS pretenda la vasta purschida mediala d’ozendi ina reducziun d’intervenziuns statalas. Lur facit: Il rapport na saja en questa furma betg duvraivel sco basa da discussiun davart il servetsch public. Uss hajan las cumissiuns parlamentaras l’obligaziun per manar ina vasta ed averta debatta.


USAM
L’Uniun svizra d’artisanadi e mastergn crititgescha ch’il Cussegl federal na mussia nagina prontadad da discussiunar ina reducziun da las prestaziuns u da variantas da budget. Cuntrari: Uss veglia el er guardar che las SRG possia sa derasar en il segment online. L’USAM pretenda dal parlament d’intervegnir davart la renovaziun da la concessiun che scada il 2017. Medias statalas online – ed er il joint venture da SRG, Swisscom e Ringier - sajan in privel per la diversitad mediala.

RR novitads 15:00