Siglir tar il cuntegn
Inhalt

Svizra Serrar l'ovra atomara Mühleberg - l'urari è publitgà

Fin ils 3 da matg po la publicitad prender invista, co l'ovra atomara Mühleberg duai vegnir serrada. Ils documents èn publitgads tar la vischnanca da Mühleberg ed èn era accessibels via internet. Tranter auter cumpiglian ils documents rapports davart eventuals disturbis.

purtret da l'ovra atomara Mühleberg
Legenda: L'ovra atomara Mühleberg duai vegnir serrada l'onn 2019. Keystone

Vitiers èn nudadas mesiras d'urgenza sco era rapports davart la cumpatibilitad ecologica. Co l'implant duai eventualmain vegnir reutilisà en il futur vegn reglà pli tard, sco l'uffizi federal per energia communitgescha.

Finanziaziun è «sin curs»

Avant las medias a Berna ha la schefa da la BKW, Suzanne Thoma, ditg ch'els quintian cun custs totals da 2,1 milliardas francs per metter ord funcziun l'ovra. Fin la fin dal 2015 aveva il concern fatg reservas da 1,59 milliardas.

Vitiers ha Thoma dà enconuschent, che dals 300 emploiads da l'ovra Mühleberg hajan 298 acceptà la plazza che la BKW ha offrì entaifer il concern.

L'ovra atomara Mühleberg era vegnida construida l'onn 1972. L'october 2013 aveva la BKW Energie AG decidì da serrar ella definitiv il december 2019.

RR novitads 12:00