Siglir tar il cuntegn

Header

Navigaziun

Davostiers in apparat da televisiun davonvart in quint da la billag.
Legenda: A partir dal 2019 na incassescha la Billag betg pli las taxas da radio e televisiun. Keystone
cuntegn

Svizra Serafe SA incassescha enstagl da Billag

En l’avegnir incassescha la firma Serafe SA las taxas da radio e televisiun en Svizra. Quai ha il Departament federal per communicaziun UVEK decidì. Il mandat era vegn scrit ora publicamain. Fin uss aveva la Billag questa incumbensa.

A partir dal 2019 surpiglia la Serafe SA la lavur d’incassar las taxas da radio e televisiun era dat quai gist ina midada dal sistem. A partir da lura pajan tut las persunas en Svizra la taxa da radio e televisiun, quai era sch’ellas na possedan betg in radio u ina televisiun. La taxa vegn dentant sbassada. La summa exacta vegn anc fixada dal Cussegl federal.

Sedia a Fehraltdorf (ZH)

La Serafe SA è ina figlia da la Secon SA cun sedia a Fehraltdorf en il chantun Turitg. Il mandat per l’interpresa cumenza l’emprim da fanadur da quest onn e finescha ils 31 da december 2025, scriva igl UVEK. La Secon haja gronda experientscha en sistems d’incasso.

Il pensum vegn ad esser d'incassar las contribuziuns. Il sistem nov vegn probabel ad ir en vigur il prim da schaner 2019. Fin la fin dal 2018 vegn la Serafe SA ad elavurar tut per pudair far las midadas necessarias.

Il futur da la Billag è malguess

Suenter la nova ch'ella perdia il mandat per incassar las taxas per radio e televisiun stoppia ella tut tenor serrar sias portas, ha ditg in pledader da la Billag. En tut sajan radund 250 collavuraturs pertutgads.

Ils 14 da zercladur 2015 aveva il pievel svizzer approvà la revisiun da la lescha da radio e televisiun che prevesa ina taxa senza ch’ella è liada vida in apparat.

RR novitads 11:00