Siglir tar il cuntegn

Svizra Senza PPS vegnia ad ir mender cun la Svizra

La PPS ha lantschà oz sin il St. Luzisteig sper Maiavilla ses cumbat electoral per las elecziuns naziunalas da quest atun. A la festa da partida ha tranter auter er l’anteriur cusseglier federal, Christoph Blocher tegnì pled. El ha undrà las valurs svizras e sajettà cunter l’UE.

Il 2015 saja in onn decisiv, ha Blocher accentuà. I giaja per chaussas fundamentalas. La Svizra haja per l’emprima giada dapi il 1848, la fundaziun dal stadi svizzer, ina regenza sanestra. I vegnia ad ir mender cun la Svizra. Sch’ella na suonda betg a la PPS, sa tschentia la Svizra en l’Uniun europeica, in «construct intellectual fallà». Ils delegads da la PPS han applaudì cun entusiassem suenter il pled da Blocher ed han fatg ovaziun en pe.

Ils temas restan tuttina

Er il president da la Partida populara svizra ,Toni Brunner, ha tegnì pled ed accentuà anc ina giada las prioritads da la PPS. Brunner vul tranter auter limitar l'immigraziun, cumbatter l’abus tar l’asil e sbassar las taglias. En pli na vul el betg ina colliaziun cun Uniun europeica.

La PPS saja bain calculabla, ha Brunner ditg als delegads en la tenda da festa sin il St. Luzisteig. La partida na stoppia persuenter betg sa storscher e drizzar cuntinuantamain sia politica al spiert dal temp.

Ils passa 800 commembers da la PPS èn vegnids beneventads a la radunanza dals delegads sin il St. Luzisteig dal president da la partida chantunala e cusseglier naziunal Heinz Brand.

«Martullo-Blocher na dovra nagina colliaziun da glistas»

Ils exponents da la PPS èn persvas che Magdalena Martullo-Blocher cuntanschia er senza la colliaziun da glistas tranter las partidas burgaisas il segund sez en il cussegl naziunal per la PPS grischuna. Oriundamain vuleva la PPS quella colliaziun da glistas. Dà hai la finala ina tranter la PBD, PCD e PLD. Tenor Toni Brunner, il president da la PPS Svizra in pass sapientiv cunter la PPS da tschellas partidas.

Proxims dis vegn decidì

Perquai ch’i n'ha betg da la colliaziun da glistas giavischada da la PPS, ponderescha quella dad er ir en il cumbat per in sez en il cussegl dals chantuns, tut tenor er cun in candidat grischun. Las contractiva han lieu ils proxims dis.