Siglir tar il cuntegn
Inhalt

Svizra Semadeni sa retira sco presidenta da Pro Natura

Sin la fin da sia perioda d'uffizi, ils 30 da zercladur 2018, sa retira Silva Semadeni sco presidenta da la Pro Natura. Cun Jean-Pierre Sorg e Rosmarie Eichenberger fineschan dus ulteriurs commembers da suprastanza lur engaschament per la Pro Natura, uschia l'organisaziun en ina communicaziun.

Purtret da Silva Semadeni en il parlament.
Legenda: Silva Semadeni è stada 16 onns a la testa da la Pro Natura. Keystone

La parlamentara grischuna, Silva Semadeni ha lavurà 22 onns per la Pro Natura, durant 16 onns è ella stada presidenta. Sut sia direcziun è il dumber da commembers creschì da radund 100'000 sin passa 133'000 persunas. Era la capacitad finanziala saja creschida considerablamain cun Semadeni, uschia la Pro Natura en ina communicaziun.

Purtret dad Ursula Schneider Schüttel.
Legenda: Usula Schneider Schüttel duai daventar successura da Semadeni. Keystone

Sco successura da Silva Semadeni propona la suprastanza la commembra Ursula Schneider Schüttel. Ella è cussegliera naziunala da la PS da Friburg ed advocata. Dapi il 2014 è ella gia en suprastanza. Plinavant ha ella experientscha entras sia lavur per il departament per l'ambient, traffic, energia e communicaziun.

Cumpetenza e Know-how

Jean-Pierre Sorg è stà dapi il 1995 en la direcziun da la Pro Natura. Il perscrutader da guauds ed anteriur docent per economia da guaud internaziunala a l'ETH Turitg è dapi il 2010 stà vicepresident da l'organisaziun. Sias expertisas e sajan stadas garant per blera cumpetenza e cuntinuitad en la suprastanza.

Rosmarie Eichenberger è dapi il 2006 en la suprastanza da la Pro Natura. Ella haja purtà sur tut il Know-how tar la colliaziun da l'agricultura e la protecziun da la natira pratica en cumbinaziun cun la planisaziun dal territori.

RR novitads 11:00