Siglir tar il cuntegn

Svizra Segn da vita da la missiunara svizra rapinada

La milissa da terror Al-Kaida en il Mali ha publitgà in video da 6 ostagis da l'exteriur. Tranter quels è era ina missiunara da Basilea.

Um cun arma avant ina rait.
Legenda: Sper la missiunara da Basilea èn anc tschintg autras persunas en mauns dals islamists (maletg da simbol). Keystone

In'organisaziun americana che survegliescha paginas d'internet islamisticas ha communitgà che Al-Kaida ha publitgà in video da 6 ostagis da l'exteriur e tranter quels è era ina missiunara da Basilea. Il video è 16 minutas e 50 secundas lung e n'è betg datà.

Il departament federal per fatgs da l'exteriur è infurmà davart il video, sco quai ch'el ha confermà sin dumonda da l'agentura da novitads SDA.

Dunna rapinada.
Legenda: Beatrice S. (mez - dat il maun) suenter l'emprima liberaziun (avrigl 2012). SRF

Ulteriurs ostagis

Sper la missiunara da Basilea èn era Ken Elliott da l’Australia, Sophie Pétronin da la Frantscha, Stephen McGown da l’Africa dal Sid, Iulian Ghergut da la Rumenia e Gloria Cecilia Narvaez Argoti da la Columbia en mauns dals islamists.

Betg prim rapiment

La Basilaisa era gia vegnida rapinada l'avrigl 2012 dad islamists. Lura era ella vegnida laschada libra suenter nov dis sut la cundiziun ch'ella na returnia betg pli enavos en il Mail.

RR novitads 10:00