Siglir tar il cuntegn
Inhalt

Svizra Segirada gia davent da la fructificaziun

La dretgira federala ha dà raschun ad ina dunna ch'aveva fatg recurs encunter ina desditga. Ella saja gia stada en speranza avant la finiziun da l'engaschament da sia plazza.

Ina dunna en speranza scriva vi da la tastatura e tegn ses venter.
Legenda: La protecziun cunter la desditga per dunnas en speranza: La dertgira federala ha dà raschun ad ina dunna che aveva fatg recurs encunter ina desditga. Keystone

La protecziun cunter la desditga per dunnas en speranza è segirada gia davent da l’emprim mument – numnadamain gia davent dal mument da la fructificaziun da la cella d’ov. Quai ha la dretgira federala decidì. Concret gievi per ina secretaria che cumbatteva la desditga d’ina clinica a Genevra.

Ils 24 da schaner 2011 aveva il patrun desditg a la secretaria per la fin da mars 2011. Ils 21 da mars ha la secretaria mess en recurs per la desditga. Ils 5 da matg ha ella infurmà la clinica ch’ella saja en speranza. La naschientscha dal uffant era ils 23 da december. La procreaziun è pia stà enturn ils 31 da mars – gist enturn il termin da desditga.

En speranza u betg en speranza – quai è la dumonda

Il stadium da quatter cellas sut il microscop.
Legenda: Il stadium tranter fructificaziun e ignivaziun: Quest curt temp – la uschè numnada Blastogenesa – era object da la dispita. Keystone

Punct dispitaivel era uschia davent da cura ch’ina purtanza vala sco purtanza. La dretgira federala ha decidì a favur da la dunna. Ella sa basava sin il punct che la fructificaziun aveva lieu avant la finiziun da la relaziun d’engaschament. Pervia da quai n’avess la clinica betg dastgà desdir ad ella.

Il patrun insistiva ch’ina purtanza cumenza pir cun la ignivaziun dal ov en la madra. La dretgira federala era dentant d’in autra opiniun. Il legislatur e la scienza hajan fixà la fructificaziun sco entschatta d’ina purtanza.

La secretaria ha uschia dretg sin 13 pajas dal mais – era las emprimas instanzas eran da quest avis.

RR novitads 15:00