Il persunal da l'agentura da novitads svizra SDA ha fatg il mardi suentermezdi durant trais uras ina chauma d'avertiment. Davent da las 14:00 fin las 17:00 han els tramess a lur abunents mo las novitads pli urgentas. La raschun per la chauma è che la direcziun da l'interpresa ha annunzià da stritgar radund in quart da las 180 plazzas.
Entant è er la Confederaziun sa maschadada en la debatta. Per l'administraziun federala sajan las novitads da la SDA in impurtant instrument da lavur, quai ha ditg il vice-chancelier André Simonazzi envers SRF. Sche la direcziun na garanteschia betg la qualitad da lavur schurnalistica possia quai avair consequenzas. La Confederaziun paja mintg'onn 2,7 milliuns francs a la SDA.
RR novitads 18:00