Siglir tar il cuntegn

Svizra Scumond da transports da rauba privlusa sin il Simplon

Ils commembers da l’organisaziun «Iniziativa da las Alps» han approvà unanimamain ina resoluziun per mauns da la ministra da traffic Doris Leuthard. La resoluziun pretenda in scumond general per transports da rauba privlusa tras las Alps.

Acziun da protest cun tablas da stopp sin il Simplon.
Legenda: Activists han protestà sin il pass dal Simplon per il scumond da transports privlus. Keystone

Concret giaja per il Pass dal Simplon. L’organisaziun «Iniziativa da las Alps» renfatscha al Cussegl federal da tolerar la situaziun al pass e da retardar in scumond da transports privlus. Mintga di transportian tranter 30 e 40 camiuns rauba privlusa sur il Simplon. Quai saja in grond risico per l’uman e l’ambient. Tenor Jon Pult, il president da l’organisaziun fissi simpel dad introducir in tal scumond al Simplon. Sco alternativa numna Pult il tunnel da viafier. Il Simplon è il sulet pass sur il qual tals transports èn anc lubids. Sur ils ulteriurs pass sco per exempel il San Bernardino u il Gottard n’èsi betg lubì da transportar rauba privlusa.

La stad passada aveva l’organisaziun surdà a la Chanzlia federala ina petiziun cun passa 10'000 suttascripziuns. Quella pretenda da la ministra da traffic Doris Leuthard da controllar pli stretg ils camiuns grevs che traversan la Svizra.

RR novitads 17:00