Siglir tar il cuntegn
Inhalt

Svizra Scorsa restanta per far colla enstagl da brischar

Scienziads da la scol'auta spezialisada a Bienna han sviluppà proceduras per nizzegiar restanzas da l'economia da laina – proceduras per far or da scorsa tannins d'auta valur.

restanzas da scorsa ed in bloc tannins
Legenda: Cun la nova procedura reusseschi d'extrahar tannins ord restanzas da scorsa da pign indigena. mad / Fond naziunal per la perscrutaziun scientifica

Scienziads da la scol'auta bernaisa (BFH) han sviluppà proceduras per extrahar tannins da restanzas da scorsa. Quest po ins duvrar sco basa per producir collas da laina. Actualmain prendan producents da collas da laina surtut substanzas da scorsas da laina tropica che vegnan producidas en l'exteriur.

Bun per economia e sanadad

Quai duai ussa midar. Al perscrutader Frédéric Pichelin da la BFH èsi gartegià d'extrahar tannins da scorsa da pign cun ina procedura cun aua en dus pass. Sco quai ch'il Fond naziunal communitgescha cuntegna la substanza resultada remarcablamain blers tannins. Era ils tests per producir collas cun quests extracts sajan empermettents.

Plattas cumprimidas senza formaldehid toxic

Ultra da quai possian ins era desister dal formaldehid toxic ch'i dovra ozendi anc per producir per exempel plattas cumprimidas. Uschia remplazzian ins collas sinteticas che sa basian sin ieli cun colla producida cun resursas che creschan en Svizra. Ed ultra da quai vegnian ins da reducir las immissiuns nuschaivlas.

Program dal Fond naziunal per la perscrutaziun scientifica

Il project tutga tar il program «Resursa laina» dal Fond naziunal per la perscrutaziun scientifica. In program cun la finamira da meglierar la disponibladad ed il niz da laina svizra. Tranter auter era cun chattar vias per nizzegiar las restanzas.

RR novitads 09:00