Siglir tar il cuntegn
Inhalt

Svizra Schneider-Ammann lauda cooperaziun da scolas autas ed economia

Il president da la Confederaziun Johann Schneider-Ammann ha accentuà l'impurtanza da la collavuraziun tranter las scolas autas e l’economia. La libertad da furmaziun e perscrutaziun stoppia dentant esser segirada, ha ditg Schneider-Ammann a chaschun dal «dies academicus» a l’Universitad da Turitg.

Johann Schneider-Ammann durant ses pled al di academic a l'Universitad da Turitg.
Legenda: Johann Schneider-Ammann durant ses pled al di academic a l'Universitad da Turitg. Keystone

En ses pled al dies academicus ha Schneider-Ammann ditg che quai saja evident per las universitads che donaturs sustegnian la scienza per pudair cuntanscher prestaziuns maximalas. Er l’universitad da Turitg collavuria cun success cun l’economia privata.

Schneider-Ammann ha uschia replicà a plirs rapports da medias ch’avevan sa dumandà schebain l’independenza da la scienza saja garantida cun daners che vegnian ord l’economia privata.

Igl è mintgamai il pensum da las scolas autas correspundentas e da las autoritads chantunalas respectivamain dal cussegl da l'ETH da mantegnair questa libertad.
Autur: Johann Schneider-Ammannpresident da la Confederaziun

Tschertgà spiert d’interprendider

Er il rectur da l’Universitad da Turitg Michael Hengartner è s’exprimì davart la debatta actuala. La credibilitad saja essenziala per l’universitad. El saja losch da la ferma collavuraziun cun l’economia. Impurtantas per il futur sajan las collavuraziuns tant cun partenaris naziunals sco er cun partenaris internaziunals. I valia da garantir la libertad da furmaziun e perscrutaziun e dad esser transparent, uschia Hengartner.

Tschertgà saja il spiert d’interprendider per cuntanscher las meglras finamiras cun meds limitads, ha sinaquai ditg il president da la Confederaziun. Quai ha el ditg en connex cun ils plans da la Confederaziun da franar las expensas per la furmaziun, perscrutaziun ed innovaziun ils proxims onns.

RR novitads 12:00