Schneider-Ammann: Guardond sin Trump «betg pessimistic»

Ils numerus schefs da concern en il futur cabinet american dattan speranza al partent president da la Confederaziun.

Johann Schneider-Ammann.

Legenda da maletgs: Auter che spetgà. Er Johann Schneider-Ammann n'aveva betg fatg il quint da l'elecziun americana cun Donald Trump. Keystone

Che Donald Trump gudognia l’elecziun sco president dals Stadis Unids n’avess il partent president da la Confederaziun Johann Schneider-Ammann betg spetgà. El ha dentant speranza en la regenza vegninta dal noviz politic Trump.

Duas brevs da gratulaziun, suttascrit mo ina…

«La saira avant l’elecziun avev’jau da suttascriver duas brevs da gratulaziun. Jau hai suttascrit mo ina. L’autra hai jau lura stuì suttascriver la proxima damaun. Er jau hai sbaglià», ha ditg Schneider-Ammann en in’intervista cun la gasetta «Schweiz am Sonntag».

Durant in telefonat cun Trump saja quai dentant reussì ad el «detg pulit» da metter la Svizra sin il radar politic dal proxim president american.

Martgads averts sco suletta schanza

Trump haja demussà respect envers la Svizra e vuleva tranter auter savair dapli da la situaziun da commerzi. «Jau na sun gnanc uschè pessimistic», ha ditg Scheinder-Ammann en l’intervista en vista a la futura regenza americana.

Trump haja numnadamain ramassà en ses cabinet blera glieud ch’hajan manà gronds concerns. «Jau suppon ch’er els han chattà lur success en lur activitads da fatschenta, cunzunt cun trair a niz ulteriurs martgads».

E martgads averts sajan la suletta schanza per la Svizra.

RR novitads 09:00