Siglir tar il cuntegn
cuntegn

Svizra Schmidheiny na cementescha nagut pli

L'industrial svizzer Thomas Schmidheiny sa retira dal cussegl d'administraziun da Lafarge-Holcim – il pli grond producent da cement dal mund.

schmidheiny che discurra
Legenda: Il president partent dal cussegl d'administraziun ed acziunari grond da la Lafarge Holcim, Thomas Schmidheiny, tar ina conferenza da medias. Keystone

L'industrial svizzer da 72 onns Thomas Schmidheiny bandunia bain il cussegl d'administraziun da Lafarge Holcim, el restia però in dals acziunaris principals dal concern, communitgescha Lafarge-Holcim. La strategia dal concern na midia quai betg, e Schmidheiny veglia salvar sia participaziun dad 11,4%.

Schmidheiny resta pia vinavant il possessur grond dal concern fusiunà. L'onn 2015 ha Thomas Schmidheiny gì gronds merits, cura ch'il concern svizzer Holcim e l'interpresa franzosa Lafarge han fusiunà.

Schmidheiny sa retiria per raschuns da vegliadetgna e duai en l'avegnir daventar president d'onur dal concern. Ensemen cun el sa retira era l'anteriur schef da la Lafarge Bertrand Collomb dal cussegl d'administraziun. Quest cumpiglia suenter mo anc 10 persunas.

RR novitads 12:00