Tge è insumma il schampagn?
Atgnamain è il schampagn nagut auter ch’in vin. I dat dentant differenzas tar la producziun dad in vin convenziunal. Ed i dat era bleras prescripziuns ch’ils producents ston tegnair en, per astgar numnar il product final schampagn.
Per ir sin la tschertga da respostas sin las dumondas enturn il schampagn, avain nus visità ils 18 da november il Salon du Champagne a Turitg. Organisà vegn quest eveniment da wiine.me, in’interpresa che vul gidar lur clients a chattar pli simpel buns vins.
3 differentas ivas
Per producir schampagn vegn duvrà 3 differentas ivas, 2 nairas ed in’alva. L’alva è quella da Chardonnay, las nairas èn la Pinot Noir e Pinot Meunier. 39% da tut las ivas èn Pinot Noir, 33% Pinot Meunier e 28% Chardonnay.
Mintga onn vegnan producids 2.7 milliuns hectoliters schampagn, quai correspunda a 385 milliuns buttiglias. La gronda part da questas, numnadamain 55%, baivan ils Franzos. Priu en tut fa la branscha da schampagn mintga onn ina svieuta da rodund 4 milliardas euros.
