Siglir tar il cuntegn

Header

cuntegn

Svizra Schaffusa: «Plans d’instrucziun davant pievel» senza schanza

Las Schaffusianas ed ils Schaffusians na vulan betg ch’il pievel decida davart il plan d’instrucziun: La dumengia han els cleramain refusà l’iniziativa dal pievel «Lehrpläne vors Volk», ed uschia era indirect s’exprimì per il plan d’instrucziun 21.

68,5% (19’742) da las votantas e dals votants da Schaffusa han ditg na a l’iniziativa tar la quala la PPS è stada la forza motorica. 31,5% (9’059) han mess in gea en l’urna. Uschia è vinavant il cussegl d’educaziun responsabel per il relasch da plans d’instrucziun.

L’iniziativa vuleva ch’il parlament approveschia en il futur tuts plans d’instrucziun – cun in’obligaziun da referendum. Sch’il parlament n’avess betg approvà in plan cun ina maioritad da 4/5 avess quai lura dà ina votaziun dal pievel.

Fin realistica per plan d’instrucziun 21

In gea a questa votaziun avess gì consequenzas per il plan d’instrucziun 21 – la mira effectiva da l’iniziativa. Malgrà la decisiun d’introducir quel sin l’onn da scola 2018/19 avess el posteriuramain stuì vegnir preschentà per l’approvaziun. Uschia fiss ina fin u almain in retard daventà realistic.

Il parlament, la regenza ed il cussegl d’educaziun avevan proponì da refusar l’iniziativa. Els eran da l’avis ch’in gremi dal fatg duai tractar ils plans d’instrucziun, e betg il parlament.

RR novitads 15:00

Artitgels legids il pli savens