Siglir tar il cuntegn

Header

Navigaziun

Il purschè da spargn.
Legenda: Cunzunt partidas pintschnas han investì cleramain dapli en reclama che anc avant 4 onns. Keystone
cuntegn

Svizra Sblundregià il purschè da spargn per far reclama

Per cumprar l’attenziun da votantas e votants han las partidas dà il settember ora radund 12 milliuns francs per inserats, placats d’elecziun e campagnas online.

Malgrà ch’i na dat anc adina betg ina transparenza cumplaina davart ils budgets da las partidas, pon ins tuttina resumar las expensas naziunalas per reclama d’elecziun: Tenor las pli novas cifras da MediaFocus han las partidas fin uss dà ora 18 milliuns francs. Tranter l’avrigl ed il settember han ellas uschia dà ora ca. 1,5 milliuns francs dapli ch’il 2011.

Las expensas per reclama n’èn quest onn betg mo pli autas, ellas sa concentreschan era pli fitg sin las davosas emnas dal cumbat electoral. Uschia èn las expensas s’augmentadas il settember per 10 milliuns francs cumpareglià cun l’avust. Avant 4 onns eran las expensas s’augmentadas per sulettamain 6 milliuns francs durant la medema perioda.

Settember buglient

Spezialmain fitg è la PCD sa concentrada sin il settember : ella ha dà ora 10 giadas dapli che l’avust. Cumpareglià cun l’avust la PS ha augmenta lur expensas per il factur 7, la PPS per il factur 6. Cun custs da reclama d’in mez milliun francs ha la PBD dà ora 13 giadas dapli che fin qua.

Legenda:
Expensas da las partidas per reclama print, internet e placats. Expensas da las partidas da l'avrigl fin l'october. mediafocus

LA PPS e la PLD èn er stadas durant il settember las partidas cun las grondas expensas. Lur expensas tranter avrigl e settember muntan a 75% da tut las expensas naziunalas.

Offline ha conjunctur‘auta

Cumpareglià cun il 2011 è plinavant da constatar ina midada dals meds da reclama. Avant 4 onns han las partidas duvrà radund 2/3 dals budgets per placats ed 1/3 per inserats. Quai trend è però sa vieuts: tranter avrigl e settember èn damain che la mesadad da las expensas vegnidas duvradas per placats.

Legenda:
Expensas totalas per reclama print, internet e placats cumulà. mediafocus

Ina rolla marginala ha gì la reclama classica online, per exempel en furma da uschenumnads banners. Campagnas da social media n’èn dentant betg inclusas en quests resultats perquai ch’ils custs correspundents èn grevs da calcular.

Thomas Milic, perscrutarder da votaziuns a l’Institut per scienzas politicas a l’Universitad da Turitg, n’è betg surstà sur da questas tacticas da reclama. Tenor el adressescha la reclama en l’internet cunzunt votants giuvens ed urbans. Ma tar quels è la participaziun a las elecziuns anc adina bassa. Uschia di Milic, ch’i rendia era vinavant d’investar dapli en campagnas classicas, pia offline cun placats ed inserats.