Las mesiras da spargn da las Viafiers federalas svizras fan surstar. Oz ha la SBB annunzià da stritgar enfin l'onn 2020 radund 1'400 plazzas. La SBB stoppia sbassar ses custs per 1,2 milliardas francs per pudair tegnair stabil ils pretschs dal traffic public.
Stritgar 1'400 e crear 200
I pertutgia surtut plazzas en il champ da l'administraziun, ma er en il manaschi da las viafiers. Cunquai che la SBB quinta il medem mument cun in augment dal traffic ils proxims quatter onns, duain vegnir creadas radund 200 plazzas novas. I dovria numnadamain dapli persunal da tren e da nettegiar.
Program da spargn
Sper ils custs da persunal duain er las investiziuns sa sminuir. Questas mesiras stettian en connex cun il program RailFit20/30 che la SBB aveva communitgà il november 2015.
Ils sindicats crititgeschan
Ils dus sindicats da viafiers, l'SEV e transfair crititgeschan fermamain il program da spargn da l'SBB. Durant che transfair mussa ina tscherta chapientscha per las midadas tecnicas ed economicas, discurra l'SEV d'in program da reducziun empè da spargn.
RR novitads 10:00