Siglir tar il cuntegn

Svizra SBB ha il nas avant la BLS – segiramain dentant mo per dus onns

La Confederaziun prolunghescha la concessiun a lunga distanza cun la viafier federala SBB per dus onns. Da tgi che survegn suenter tgeninas lingias, vul il Cussegl federal infurmar fin la mesadad dal 2018. Quai ha il Cussegl federal fatg a savair il glindesdi.

In tren BLS exact sper in tren SBB.
Legenda: Per la midada da l'urari il 2019 vul l'uffizi decider, tgi che surprenda tgeninas lingias. Keystone

Anc fin la fin dal 2019 è la situaziun clera: Fin lura survegnan las Viafiers federalas svizras SBB anc ina giada la concessiun per il traffic a lunga distanza.

Concurrenza per la SBB pussaivla a partir dal nov urari 2019

Cun quai che la concessiun actuala per il traffic a lunga distanza expira sin la fin da quest onn, han gia stuì vegnir inoltradas las offertas per la concessiun nova. Per quella aveva offrì sper la SBB er la BLS. La BLS vul numnadamain surpigliar intginas lingias dal traffic lontan e concurrenzescha perquai cun la SBB.

Per decider èn necessarias anc ulteriuras infurmaziuns

Suenter avair analisà las duas offertas veglia l’Uffizi federal da traffic far in’analisa approfundada e dumandar ulteriuras infurmaziuns dals dus offerents. Fin la mesadad dal 2018 vegn lura l’uffizi a decider, tgi che surpiglia a partir da la fin dal 2019 tgeninas lingias dal traffic a lunga distanza.

Quai ha il Cussegl federal fatg a savair il glindesdi en ina communicaziun a las medias.

RR novitads 14:00