Cun l'urari 2020 schlargia la SBB sia purschida regiunala, naziunala ed internaziunala. Davent dals 15 da december curseschan 1,8% dapli trens en il traffic regiunal ed 1,5% dapli trens en il traffic a gronda distanza.
Sco quai che la SBB communitgescha saja in dals puncts ils pli marcants da la midada da l'urari il «Léman-Express». Questa pli gronda rait sur cunfin da l'Europa collia sin in traject da 230 km 45 staziuns en ils chantuns Vad e Genevra sco er en il Département franzos Haute-Savoie. Da la nova rait da viafier profiteschan radund 1 milliun persunas.
La pli impurtanta midada en il traffic regiunal pertutga la colliaziun da la lingia S29 da Turgi ad Aarau cun la S8 da Sursee ad Olten tar la nova S29. Er bajegiadas ora vegnan las lingias da la S1 tranter Sursee, Lucerna e Baar sco er la Seetalbahn tranter Lucerna e Lenzburg. Ed er ils utilisaders da l'uschenumnà «Läuferfingerli» en il chantun Basilea-Champagna survegnan meglras colliaziuns a la rait naziunala.
RR novitads 12:00