Siglir tar il cuntegn

Svizra Sang dà vegn examinà pli sever

Sang dà vegn examinà sin quatter virus, uss vegn in ulteriur test natiers perquai che novs virus sa derasan.

Rudolf Schwabe, il directur da «Blutspende Schweiz».
Legenda: Rudolf Schwabe, il directur da «Blutspende Schweiz». Keystone

Curt e concis:

  • Sang dà vegn examinà avant ch'i vegn tar in pazient.
  • Quest sang vegn dentant examinà sulet sin quatter virus.
  • Uss vegn in ulteriur test vitiers ed i pudessan suandar anc daplirs perquai che novs virus sa derasan.

Ils labors dals servetschs da dar sang regiunals tschertgan oz HIV e hepatitis A, B e C. Uss vegn in ulteriur test natiers; il sang vegn en futur era examinà sin hepatitis E, ha declerà il directur da «Blutspende Schweiz», Rudolf Schwabe. El di ch'il virus hepatitis E vegn examinà en il decurs da l'atun en l'entira Svizra.

Dapi curt saja numnadamain cler: hepatitis E vegn era dà enavant sur il sang e betg be cun mangiar charn criva. E la malsogna possia esser malsegira. «Pazients cun in sistem d'immunitad flaivel pon vegnir en privel da vita pervi dal virus hepatitis E», ha ditg Schwabe enavant. Perquai il nov test a partir da l'atun.

Malsognas che mustgins dattan enavant

Schwabe va da quai ora ch'i saja necessari en futur anc daplirs tests. Virus da malsognas tropicas vegnian adina pli datiers da la Svizra perquai che las persunas èn pli mobilas ed il clima sa mida. Concret sa preparia «Blutspender Schweiz» da testar il sang era sin il virus dal Nil dal Vest ed il virus da Chikungunya. Pia virus che vegnan dads enavant entras mustgins.

Quests dus virus èn cumparids la stad en l'Italia e la Frantscha u er en l'ost da l'Austria. Ils mustgins pon senz'auter era cumparair en Svizra.
Autur: Rudolf SchwabeDirectur «Blutspende Schweiz»

Cler è ch'ils custs per preparats da sang creschan cun mintga test supplementar che sto vegnir fatg. Sin ils ospitals sco clients principals vegnan uschia encunter pli auts custs.