Il Cussegl dals chantuns è vinavant cunter ina midada da paradigma tar la politica da sancziuns svizra. Il Cussegl federal na duai er en l'avegnir betg pudair decider sancziuns a moda autonoma. La fatschenta va uschia puspè enavos en il Cussegl naziunal.
En vista a l'offensiva russa en l'Ucraina aveva quel decis ch'il Cussegl federal possia decider en atgna reschia davart sancziuns cunter persunas ed interpresas che cuntrafan massivamain als dretgs umans. Fin oz po la Svizra be surpigliar sancziuns da l'ONU, da l'UE u da l'OSCE.
Cussegl federal era encunter
Il Cussegl federal era cunter sancziuns autonomas. Ils paucs avantatgs na stessan en nagina relaziun cun ils dischavantatgs massivs, ha il minister d'economia Guy Parmelin avertì en la debatta dal Cussegl dals chantuns.
