Salvar ils daners uschè ditg sco pussaivel

Las Svizras ed ils Svizzers n'èn betg uschè punctuals da pajar lur quints. En media sa laschan els 31 dis temp e sa chattan uschia davos la media europeica. Quai malgrà in termin da pajament generus da 27 dis. Ed er fatschentas ed il maun public sa laschan temp.

Ina scadiola sin figls sin ina maisa. Dasper in quintader electronic.

Legenda da maletgs: Ina metoda per evitar il retard: 69 pertschient da las firmas svizras pretendan dals clients in pajament anticipà. Keystone

La morala da pajar en Svizra n’è betg fitg buna. En media dovran ils Svizzers 31 dis per pajar lur quints. Ils vischins en l’ulteriur’Europa dovran be 21 dis. Quai resulta dal rapport da l'interpresa d'incasso Intrum Justitia.

Er maun public è plaun

Ma betg mo persunas privatas pajan lur quints plitost tard. Uschia pajan Confederaziun, chantuns e vischnancas lur quints en media pir suenter 45 dis. Temp avessan ellas 34 dis.

Quest fatg haja consequenzas. Vegnissan ils quints pajads punctualmain pudessan interpresas pitschnas e mesaunas stgaffir dapli plazzas.

Damain retard tar firmas svizras

La morala da pajar da las firmas svizras è però in zic meglra en cumparegliaziun europeica. 77 pertschient da las firmas svizras argumenteschan lur retard da pajar cun problems finanzials. Il motiv sin il segund plaz è ina retardaziun intenziunada (64 pertschient). Tar la mesadad da las firmas mainan sfidas administrativas ad in pajament tardiv.

Il studi ha l’interpresa Intrum Justitia fatg tranter il favrer ed avrigl. Radund 10’000 interpresas en 29 pajais europeics en vegnidas dumandas.

RR novitads 12:00