Siglir tar il cuntegn
Inhalt

Svizra Sa volver a polizia ed armada en temps malsegirs

Undas da fugitivs, terrorissem e guerra procuran per malsegirezza. Er adina dapli Svizzers guardan en l’avegnir cun intschertezza. En consequenza daventan la polizia ed il militar adina pli impurtants. Quai è la conclusiun d'in studi davart la segirezza da l'academia militara e da l'ETH da Turitg.

La polizia en acziun a Basilea durant il til da l'emprim da matg.
Legenda: Procurar per ruaus. La polizia en acziun a Basilea durant il til da l'emprim da matg. Keystone

L’academia militara ed il «Center for Security Studies» da l’ETH Turitg han publitgà il studi «Segirezza 2016». Tenor la retschertga crajan trais quarts dals dumandads che la situaziun politica mundiala vegnia anc pli precara durant ils proxims tschintg onns. Avant in onn eran quai anc passa la mesadad.

Segirezza avant libertad

Nov da diesch persunas han inditgà da sa sentir segiras. Ma gist areguard il cumbat cunter il terrorissem è la segirezza pli impurtanta che libertad.

Uschia inditgeschan dus terzs dals dumandads d’esser pronts d’acceptar restricziuns da la libertad persunala per pudair cumbatter il terrorissem «cun tuts meds».

Dapli polizia - sustegn per l'armada

Tge che fa forsa surstar: 87 pertschient dals dumandads èn da l’avis ch’ins duaja rimnar datas davart persunas suspectads. Il medem dumber da persunas vul er duvrar l’armada per sustegnair la polizia, cura che quella è surdumandada da procurar per ruaus. Las valurs èn cleramain pli autas ch’ils ultims onns.

82 pertschient vulan dapli polizia ed 84 pertschient sprovan l’armada.

Svizra para da s'isolar

La neutralitad ha vinavant ina gronda muntada. 95 pertschient dals dumandads sustegnan il principi. Ensemen cun quest resultat va ina tendenza d’isolaziun da la Svizra: Mo anc 22 pertschient èn per daventar commember da l’Organisaziun dal pact da l’Atlantic da Nord NATO. A medem temp èn be pli 16 pertschient (avant 21 pertschient) per in’entrada svizra en l’Uniun europeica.

L’enquista è vegnida fatga il schaner passà. En tuttas regiuns linguisticas èn vegnidas dumandadas 1’211 votantas e votants.

RR novitads 11:00