Siglir tar il cuntegn

Header

cuntegn

Sa sentir durant la crisa Populaziun sa tegna vid mesiras – perda però in zic la pazienza

La fidanza en la politica è anc adina gronda, Svizzers e Svizras han damain contacts cun autras persunas – e tuttina bandunan els puspè pli savens lur dachasa. Quai mussa la segunda retschertga naziunala che l'institut da perscrutaziun Sotomo ha fatg per incumbensa da la SRG SSR.

92% da la populaziun ha bandunà l'emna passada ses dachasa, il pli savens è quai stà il cas per ir a far cumpras. Cumpareglià cun la retschertga dal mars èn uschia puspè dapli persunas idas ord chasa (grafica 1). Bain èn damain persunas ch'avant duas emnas idas ord chasa per far cumissiuns, persuenter è la glieud ida ora pli savens per ir a spass u per far sport.

Grafica che mussa las raschuns dals Svizzers per ir ord chasa.
Legenda: Grafica 1: Pertge avais Vus bandunà Vossa chasa / abitaziun? RTR Grafica

L'appell da l'Uffizi federal da sanadad da betg bandunar ses dachasa sa drizza surtut a las persunas pli veglias ch'èn periclitadas pli ferm da la malsogna covid-19. Cumpareglià cun l'ultima retschertga da Sotomo dal mars van ussa damain persunas sur 65 onns ord chasa per far cumissiuns. Avant duas emnas eran quai anc 64% dals dumandads sur 65 onns, uss anc 44%.

La retschertga

Avrir la box Serrar la box

Era questa segunda retschertga naziunala ha l'institut da perscrutaziun Sotomo fatg sin incumbensa da la SRG SSR. En tut han 29‘891 persunas respundì las dumondas publitgadas online tar RTR, SRF, RSI, RTS e Swissinfo. La retschertga è vegnida fatga sur la fin d'emna dals 3 fin ils 6 d'avrigl 2020. La quota da sbagls munta a +/- 1,2 puncts procentuals.

Malgrà quest desideri dad ir giuadora a sa muventar, mussa la retschertga era che la populaziun accepta e sa tegna vid las mesiras.

Dumber da contacts è sa reducì

Il svilup tar il dumber da contacts mussa, che l'appell da tegnair distanza cuntanscha adina pli grondas cumparts da la populaziun. Tar la retschertga dals 22 da mars aveva anc 38% da la populaziun inditgà d'avair nagins contacts pli stretgs ordaifer l'agen dachasa. L'emna avant ils 5 d'avrigl è quella cumpart creschida sin 47%.

audio
Quant bain accepta la populaziun las mesiras per franar il coronavirus?
ord Actualitad dals 07.04.2020.
laschar ir. Durada: 3 minutas 37 Secundas.

En egl dat, ch'era persunas che tgiran per ordinari blers contacts han reducì l'emna passada il dumber da contacts (grafica 2). Uschia è il dumber da contacts tar la populaziun pli giuvna, tranter 15 e 35 onns, sa reducì en media dad 8 contacts per emna sin 5. E sur l'entira populaziun è il dumber da contacts per emna e per persuna sa reducì da 4,2 sin 3,0 contacts.

Grafica che mussa cun quantas persunas Svizzers da differentas vegliadetgnas han contact.
Legenda: Grafica 2: Cun quantas persunas, che na vivan betg en Voss dachasa, avais Vus gì contact? RTR Grafica

Pli gronda fidanza en manaders politics

Tar l'emprima retschertga avevan anc 63% dals dumandads inditgà dad avair gronda u fitg gronda fidanza en las autoritads politicas. Questa cumpart è creschida aifer duas emnas sin 67% (grafica 3). Fertant che la fidanza en las autoritads n'è betg grond sa midada en la Svizra tudestga, han ils manaders politics gudagnà fidanza en la Svizra latina.

Raschun per la sceptica envers ils manaders politics era surtut l'opiniun ch'il Cussegl federal haja reagì memia tard cun mesiras per franar il coronavirus e che la situaziun en ils ospitals pudess ir ord controlla.

Grafica davart la fidanza en manaders politics
Legenda: Grafica 3: Quant fitg fidais Vus als manaders politics en Svizra? RTR Grafica

Dapli detagls da l'emprima retschertga da Sotomo chattais qua:

RTR novitads 17:00

Artitgels legids il pli savens