Sa preparar per fugitivs da l'Austria

A Buchs en il chantun Son Gagl èn la Polizia chantunala e la guardia da cunfin prontas da retschaiver fugitivs che pudessan vegnir cun trens da l’Austria, quai rapporta il radio SRF.

Fugitivs van a bord d'in tren.

Legenda da maletgs: Ils 31 d'avust èn radund 300 fugitivs arrivads al cunfin austriac a Hegyeshalom en l'Ungaria. Keystone

Gia dapi emnas vegnian adina dapli fugitivs cun trens da l’Europa da l’Ost. La gronda part dals fugitivs sajan famiglias cun uffants da la Siria u da l’Irac, conferma in pledader da la polizia.

La guardia da cunfin e la Polizia chantunala dal Son Gagl stettian en stretg contact cun las autoritads austriacas ed observian la situaziun, er per pudair intervegnir en cas urgents.

Fin 300 fugitivs arrivan a Minca

A Minca en Germania è glindesdi saira tard arrivà in tren cun fugitivs da l’Ungaria. Tenor la polizia sa chattavan circa 200 enfin 300 fugitivs en il tren. Per part èn las persunalias anc vegnidas registradas sin la staziun principala da Minca, per part èn ils fugitivs vegnids repartids sin dimoras per requirents d’asil en Bavaria.

Destinaziun Germania

La gronda part dals fugitivs viageschan en la Germania. Sco quai che la polizia austriaca ha communitgà èn enfin a 2’000 fugitivs viagiads da Salzburg en direcziun da la Germania. La gronda part haja passanta la notg en la staziun. I sa tractia cunzunt da famiglias.

Sulet trais persunas hajan dumandà asil en la citad da Salzburg, conferman las autoritads localas. L’Austria lascha passar ils fugitivs che na vulan betg dumandar asil austriac en direcziun dals pajais vischins.

Austria crititgescha l'Ungaria

Il chancelier austriac Werner Faymann ha crititgà la regenza ungaraisa: i na saja nagina politica da simplamain trametter ils fugitivs en il pajais vischin, ha ditg Faymann en in’intervista. Il president ungarais Viktor Orban saja responsabel da guardar, che las leschas vegnian respectadas e che controllas vegnian fatgas.

Glindesdi eran plirs 100 fugitivs viagiads cun trens davent da Budapest en l’Ungaria en direcziun da l’Austria e da la Germania.

RR novitads 06:00