La situaziun actuala da corona en Svizra saja anc adina fragila. Las cifras sajan anc memia autas, i dettia dentant perspectivas. Uschia han expertas ed experts da chantuns e da la Confederaziun valità il mardi la situaziun actuala da la pandemia.
Adina dapli persunas vaccinadas
Cuntenta è Virginie Masserey dal BAG sa mussada da la situaziun da vaccinar. Il dumber da persunas vaccinadas creschia. Dals 5 fin ils 11 d'avrigl sajan en Svizra passà 210'000 dosas vegnidas vaccinadas, per di sajan quai stadas uschia passa 30'000 vaccinaziuns. Cumpareglià cun l'emna avant saja la cadenza da vaccinaziun s'augmentada per 25%. E 8% da la populaziun svizra saja gia vaccinada cumplettamain.
En Grischun èn quai bun 9%. Las proximas emnas quinta la Confederaziun cun grondas furniziuns da vaccin. Da l'avrigl fin il zercladur spetga la Confederaziun 8 milliuns dosas dal vaccin.
Er facturs socials ston vegnir resguardads
Davart pussaivlas averturas per il proxim temp è Masserey s'exprimida a moda precauta:
Sche nus avrin, lura è quai er collià cun in tschert ristg.
Trais da quatter criteris da la Confederaziun na sajan betg ademplids. Quellas valurs directivas na sajan dentant betg sacrosanctas. I valia er da resguardar facturs politics e psicologics, ha ditg Masserey.
