Il rumantsch duai er surviver en la diaspora. In terz da las pledadras ed ils pledaders rumantschs vivan ordaifer il territori rumantsch. Per quels organisescha la Lia Rumantscha occurenzas a Basilea, Berna, Lucerna, Son Gagl/Appenzell e Winterthur.
Emprim inscunter a Lucerna
Sper la pussaivladad per scuntradas duain ils basegns da las Rumantschas e dals Rumantschs vegnir sclerids. A Lucerna e stada la sonda passada l'emprima da questas occurenzas. En las autras citads suondan ils termins fin l'entschatta da l'onn proxim.
Las occurenzas vegnan sustegnidas entaifer il project «Rumantsch en la diaspora» da la Confederaziun. L'Uffizi federal da cultura ha concedì 50'000 francs per il project. Il project duai metter il fundament per ina «collavuraziun instituziunalisada cun persunas en la diaspora».
Da quai profita era l'Uniun Cultura Rumantscha Lucerna. Cun il sustegn vegnan ils proxims mais organisadas pliras activitads. Per exempel suentermezdis da zambregiar e chantar cun ils uffants, dis d’inscunter per las famiglias, ma era sairas per ils creschids.
La finamira è ch’ils uffants han era contacts socials rumantschs ordaifer la famiglia e pon uschia sviluppar las cumpetenzas da la lingua rumantscha.