Siglir tar il cuntegn
Inhalt

Svizra Rüschlikon la pli attractiva vischnanca en Svizra

La vischnanca da Rüschlikon en il chantun Turitg resta la pli attractiva vischnanca da la Svizra. Quai scriva la «Weltwoche». Sin plazza dus e trais èn las vischnancas Meggen (LU) e la citad da Zug.

La staziun da viafier da Rüschlikon en il chantun Turitg.
Legenda: La staziun da viafier da Rüschlikon en il chantun Turitg. Keystone

Examinadas èn vegnidas las 924 vischnanca en Svizra cun dapli che 2’000 abitantas e abitants. En tut èn stads 50 criteris decisivs, tranter auter: lieu da la vischnanca, segirezza, taglias, plazzas da lavur, sco era la purschida da shopping, cultura e da temp liber. Uschia suondan tenor la «Weltwoche» sin plazza dus e trais las vischnancas da Meggen (LU) e Zug.

Naginas citads grondas en ils top 20

Las grondas citads en Svizra mancan entaifer ils top 20. La citad da Turitg vegn sin plazza 22, Genevra 45, Basilea 126 e Berna la finala sin plazza 168 dal classament da la «Weltwoche». Sin l’ultima plazza vegn la Val-de-Travers en il chantun Neuchâtel al cunfin cun la Frantscha. Surtut la grevezza fiscala en la Val-de-Travers è la pli auta tenor il rating.

RR novitads 06:00