Siglir tar il cuntegn

Header

cuntegn

Svizra Roschada en il Cussegl federal – Sommaruga e Parmelin midan

Suenter discussiuns e para er dispitas en il Cussegl federal è uss cler, tgi che survegn tgenin departament: Berset, Maurer e Cassis restan en lur departaments. Sommaruga e Parmelin midan. Amherd surpiglia la defaisa, Keller-Sutter la giustia. Quai è vegnì communitgà il glindesdi.

Per la proxima perioda d'uffizi restan trais departaments en ils medems mauns:

  • Departament federal dals affars exteriurs (DFAE) Schef resta Ignazio Cassis (PLD/TI).
  • Departament federal da l'intern (DFI) Schef resta Alain Berset (PS/FR).
  • Departament federal da finanzas (DFF) Schef resta Ueli Maurer (PPS/ZH).

audio
Saira: Il Cussegl federal e la repartiziun dals departaments
ord Actualitad dals 10.12.2018.
laschar ir. Durada: 5 minutas 42 Secundas.

Novas sfidas per Parmelin e Sommaruga

Midaments datti tar quatter departaments. La repartiziun mussa ch'ils actuals han pudì metter tras lur giavischs e surpigliar ils departaments ch'els giavischavan.

  • Departament federal d'economia, furmaziun e retschertga (DEFR) NOV schef è Guy Parmelin (PPS/VD) – el surpiglia da Johann Schneider-Ammann (PLD/BE).
  • Departament federal per ambient, traffic, energia e communicaziun (DATEC) NOVA scheffa vegn Simonetta Sommaruga (PS/BE). Ella surpiglia da Doris Leuthard (PCD/AG).

Per la PS ha Simonetta Sommaruga pudì surpigliar il departament federal per ambient, traffic, energia e communicaziun – in success per sia partida.

Las novas: Keller-Sutter survegn la giustia, Amherd il militar

Quai vul dir che las duas cusseglieras federalas novas han survegnì quels departaments ch'èn vegnids libers:

  • Departament federal da giustia e polizia (DFGP) NOVA scheffa vegn Karin Keller-Sutter (PLD/SG). Ella surpiglia da Simonetta Sommaruga (PS/BE).
  • Departament federal da defensiun, protecziun da la populaziun e sport (DDPS) NOVA scheffa vegn Viola Amherd (PCD/VS). Ella surpiglia da Guy Parmelin (PPS/VD).

La PCD na tutga betg tar las victuras da la roschada. Viola Amherd è bain l'emprima dunna insumma che maina il militar svizzer, ses departament da giavisch n'era quai dentant betg propi.

Emprimas grondas discussiuns en il Cussegl federal nov

Il Cussegl federal vuleva gia communitgar il venderdi passà, tgi che duai manar en avegnir tgenin departament. Surprendentamain n'eran ils magistrats e las magistratas betg vegnidas da sa metter d'accord. Perquai èn las decisiuns e la communicaziun sa retardadas enfin glindesdi.

Suenter las demissiuns da Doris Leuthard e Johann Schneider-Ammann èn ils departaments da traffic, energia e communicaziun sco er il departament d'economia, furmaziun e perscrutaziun stads vacants.

RR novitads 14:00

Artitgels legids il pli savens