Siglir tar il cuntegn

Svizra Rösti: Medias finanziadas dal stadi stranglan purschiders privats

La Partida populara svizra vul limitar las intervenziuns dal stadi en il sectur da las medias. Latiers ha ella surtut en mira la SRG SSR ch'è en lur egls daventada memia pussanta.

Albert Rösti a la conferenza da medias a Berna.
Legenda: Albert Rösti a la conferenza da medias a Berna. Keystone

La PPS sa dosta er cunter ina regulaziun da la sparta online. Quest champ duaja vegnir surlaschà ad interpresas privatas.

Interpresas statalas (co-)finanziadas dal stadi sco la SRG SSR, la Swisscom u la Posta sa derasian en adina novs champs dal martgà medial ch’era fin qua resalvà a privats, uschia Rösti.

Medias finanziadas dal stadi stranglan uschia ils purschiders privats.
Autur: Albert Röstipresident PPS

L'independenza da las medias d'influenza statala e da daners publics saja elementara per ina democrazia, ha ditg il president da partida e cusseglier naziunal Albert Rösti a chaschun da la preschentaziun d’in palpiri da posiziun.

Il sistem vertent da finanziaziun cun taxas da la SRG SSR ed er emetturs privats da radio e televisiun resultia en adina dapli dependenza dal stadi, uschia Rösti. Tenor la PPS fiss quai pussaivel da reducir las taxas da recepziun per la mesadad sin 200 francs ad onn.

RR novitads 11:00