Ils delegads da la PPS èn cunter l’iniziativa per la sortida da l’energia atomara. Ina maioritad clera ha decis da dir na a quest’iniziativa. A las utopias dals collegas verds stoppian ins metter fin, ha ditg il cusseglier naziunal dal chantun Vad, Michel Buffat. Las consequenzas da l’iniziativa per la glieud e l’economia fissan negativas. Davart questa iniziativa vuscha la Svizra ils 27 da november.
Il president lava chaus al Cussegl federal
Albert Rösti crititgescha era il cumportament da la PCD e da la PLD. Els sa mettian da la vart sanestra en chaussa, durant la radunanza da delegads a Balsthal en il chantun Solothurn. Cun la cuntraproposta da l’iniziativa «Vegnir or da las stretgas», RASA veglia il Cussegl federal, tranter auter, metter il dretg internaziunal davant il svizzer.
Uschia sutminescha la gronda part dal Cussegl federal la suveranitad ed il dretg da decider sez dals Svizzers
Rösti è da l'avis che la regenza saja sa messa en la medema crenna sco quels che violeschian la constituziun. El ha discurrì d'in putsch discus dals trais plauns da la regenza.
La PPS vul che l'iniziativa per l'immigraziun da massa vegnia realisada cun ina favurisaziun d'indigens, contingents e dumbers maximals. Quai stoppia sche necessari avair sco consequenza ina visada dals contracts da la libra circulaziun da persunas.
L'iniziativa RASA vul stritgar l'artitgel d'immigraziun or da la constituziun. Cun la cuntraproposta vegn il termin per realisar l'iniziativa d'immigraziun prolungà.
RR novitads 12:00