A partir da lura vegnia Roche puspè a pudair furnir plirs tschient milli tests a di a las apotecas, ha communitgà Roche sin dumonda da l'agentura da novitads Keystone-SDA. Els partan dal fatg ch'i sajan abels da cuvrir en il decurs da l'emna l'entira dumonda per tests.
Roche haja dapi ch'i hajan la lubientscha speziala l'entschatta mars, repartì radund 9 milliuns autotests ad apotecas. Er venderdi hajan ins repartì passa in mez milliun tests a clientella svizra. Cun quai saja la dumonda en Svizra vegnida cuvrida per la pli gronda part.
Tenor rapports da medias e da perditgas haja dà gia sonda stretgas tar la furniziun, uschia ch'ins haja pudì retrair be pli in test. Mesemna aveva l'uniun d'apotecas Pharmasuisse anc declerà che Roche possia furnir in milliun tests a di.