Siglir tar il cuntegn

Header

cuntegn

Svizra Ritter: «Nus n’essan insumma betg engurd»

Il president da l’Uniun purila svizra, Markus Ritter, na vul savair nagut d’in «regal da taglia». Il levgiament da taglia saja mo gist. Entant lauda el la reputaziun dals purs ed il sentiment da solidaritad en il parlament.

Il president da l’Uniun purila svizra, il cusseglier naziunal da la PCD Markus Ritter, ha refusà la renfatscha d’engurdientscha suenter il regal da taglia dal Cussegl naziunal als purs. Si’associaziun n’haja nagin problem da reputaziun.

«Nus n’essan insumma betg engurd», ha ditg Ritter en intervistas cun la «Nordwestschweiz» e la «Südostschweiz» da la sonda. Il purs hajan dapi in lung temp fatg naginas dumondas per pli auts pajaments directs

«Nossa suletta finamira èsi da survegnir il sustegn existent. Senza quel na po l’agricultura svizra betg surviver», uschia Ritter.

Losch da ferma lobby

L’agricultura saja dapi onns il sulet champ politic en il qual las expensas na sajan betg creschidas. «Nus avain be pretendì quels daners che Cussegl federal e parlament han empermess tar l’ultima refurma agrara».

Areguard la dumonda da la taglia sin gudogn cumbattian ils purs be per in tractament egual cun persunas privatas e possessurs da firmas – gist sco quai saja stà il cas fin il 2011.

Tenor Ritter n’ha la lobby da l’agricultura er nagin problem da reputaziun. En rom d’enquistas vegnia quai regularmain attestà ina reputaziun excellenta a l’agricultura svizra. Ils purs hajan in bler meglier image ch’autras branschas. E Ritter di ch’el saja losch che la lobby agricula haja ina da las meglras en la politica svizra. En il parlament sajan ils purs represchentads en tschintg fracziuns, numnadamain tar ils Verds, la PCD, PBD, PLD e PPS.

Il «sbagl politic» da Parmelin

Il fund per las remartgas da Ritter èn renfatschas suenter ina decisiun dal Cussegl naziunal en la sessiun extraordinaria. Là èsi vegnì decis ina midada da la lescha davart la taglia sin vendita da terrens agriculs. E tenor quella decisiun perdessan Confederaziun ed AVS mintg’onn mintgamai 200 milliuns francs.

La decisiun aveva la finamira da restabilir il stadi da dretg dal 2011. Quest «regal da taglia» ha evocà en il parlament ferma critica envers la lobby da l’agricultura. Er il cusseglier federal Guy Parmelin ha gì da sbatter cun ses engaschament per quest levgiament da taglia.

RR novitads 12:00

Artitgels legids il pli savens