Siglir tar il cuntegn
Inhalt

Svizra Ringier e Swisscom vulan cumparts da la SRG d'Admeira

La gruppa da medias Ringier e la Swisscom vulan surpigliar las cumparts da la SRG SSR da l'allianza da reclama Admeira. Quai ha Ringier communitgà. Las tractativas tranter ils trais partenadis duran anc.

Las l'ocalitads d'Admeira.
Legenda: Las tractativas tranter Ringier, Swisscom e la SRG duran anc. Keystone

Represchentants da la branscha han crititgà la participaziun da la SRG SSR da l'entschatta ennà. L'allianza pericliteschia la diversitad da medias en Svizra.
Er la dretgira federala ha taxà quella sco problematica.

Tractativas duran anc

Ringier ha orientà davart questas tractativas a chaschun da lur conferenza da bilantscha a las medias a Turitg. Las tractativas sajan da cuntin. La SRG SSR tegna actualmain 33,3%. Anc adina saja la mira da pudair gudagnar ulteriurs partenaris per Admeira per uschia rinforzar il martgà da medias en Svizra. Cun l'allianza vulan Ringier, la Swisscom e la SRG reussir meglier envers ils gronds da l'internet sco Google, Facebook e Youtube.

Era Tamedia ha interess

Mez mars ha il Tribunal federal confermà la sentenzia da l'instanza antecessura: Ils recurrents pon proceder legalmain cunter Admeira. Tar las medias che han purtà plant tutgan Tamedia ed AZ Medien. Sco il schef da concern da Tamedia, Christoph Tonini, ha ditg, sajan els interessads da cumprar cumparts d'Admeira.

RR novitads 12:00