Gia dapi l'entschatta da l'onn era cler, ch'i dettia trais persunas che vulan succeder a Clà Riatsch. Uschia l'Engiadinaisa Annetta Ganzoni, Renzo Caduff da Mustèr e Rico Valär ch'è oriund da Zuoz. Ussa, suenter bunamain in onn ha l'Universitad da Turitg communitgà che Rico Valär saja elegì. El entschaiva ses pensum l'emprim d'avust 2018. Enfin lura lavura el vinavant tar l'Uffizi federal da cultura a Berna. Ad instruir ed accumpagnar studentas e students cumenza el però gia il favrer.
Il giuven dals trais candidats
L'um da Zuoz ha studegià romanistica cumparativa, rumantsch e litteratura franzosa a l'universitad da Turitg. Ed el è cun annada 1981 il giuven tranter ils candidats. El lavura actualmain tar l'Uffizi federal da cultura a Berna. Dasperas è el er engaschà sco editur, recensent e translatur. En pli lavura el tar Radiotelevisiun Svizra Rumantscha sco moderatur.
Referats d'emprova avant students ed interessads
Il favrer avevan ils trais candidats tegnì a l'Universitad da Turitg referats d'emprova. Rico Valär aveva tegnì ses referat davart il tema «Chara lingua da la mamma – chara mamma da la lingua: il laud da la lingua materna en poesias dals moviments da renaschientscha da las linguas neolatinas minoritaras».
Co finanziar assistenza n'è betg cler
L'atun 2016 aveva l'ETH Turitg communitgà ch'ella stritgia la contribuziun da 100'000 francs per il sustegn dal rumantsch a l'Universitad Turitg. Per in mument hai parì sco sche la professura fiss en privel.
Ussa èsi cler: La professura rumantscha a l'universitad da Turitg è garantida. La finanziaziun per l'assistenza dentant betg. Rico Valär ha dentant manegià che quai na saja nagut extraordinari. Era en auters roms stoppian doctorands tschertgar vias per finanziar lur lavur.
RR novitads 11:00