La revisiun parziala da la lescha da chatscha federala che prevesa tranter auter da schluccar la protecziun dal luf vegn crititgada da bleras varts. Las organisaziuns da l'ambient e la sanestra refusan quella. Per la PPS, ils adversaris dal luf, ils purs ed il chantun Vallais va quella però memia pauc lunsch.
Decimar la populaziun dals animals duai esser lubì
Il Cussegl federal propona, tranter auter, da reducir il dumber da tscherts animals selvadis protegids sche quels fan gronds donns u pericliteschan l'uman. En la lescha èn menziunà il capricorn e da nov era il luf.
En princip betg cunter la reducziun da las rotschas
La PS e las organisaziuns per la protecziun da l’ambient Pro Natura, WWF e BirdLife Schweiz n’èn en princip betg cunter ina reducziun da la rotscha da lufs sch’i dat problems cun tscherts individis. Ma ins stoppia garantir ina populaziun dal luf capabla da surviver. La proposta da lescha n’accumpleschia betg questa cundiziun. Quai è la critica da las organisaziuns per la protecziun da l’ambient.
Ir a chatscha da lufs
Da tut in auter avis èn, tranter auter, la PPS, l’Uniun purila svizra ed il Chantun Vallais. Els vulan stritgar il luf da la glista dals animals periclitads e vulan ir a chatscha dad els sco quai ch’els fan tar chavriels, chamutschs u tschiervs. En Svizra cun sias regiuns fitg populadas na dettia nagin plaz per animals da rapina gronds
Sustegn datti sulet da la PLD, PBD e l'associaziun Chatscha Svizra. La proposta adempleschia las premissas per ina meglra convivenza tranter il luf e la populaziun.
RR novitads 15:00