Siglir tar il cuntegn

Header

Duas dunnas pensiunadas sin in banc.
Legenda: Actualmain existan differents plans per la vegliadetgna da renta: Il Cussegl federal vul augmentar sur quatter onns la vegliadetgna da renta da dunnas da 64 sin 65 onns. Questa intenziun ha dentant gia fatg duas giadas naufragi a l'urna. Keystone
cuntegn

Retschertga Persunas pli veglias èn cunter auzar la vegliadetgna da renta

La populaziun svizra tranter 50 e 70 onns è plitost cunter d'auzar la vegliadetgna da renta. Auzar la vegliadetgna da renta per dunnas da 64 sin 65 onns refusa bunamain la maioritad da questa generaziun.

Ina maioritad da la populaziun svizra tranter 50 e 70 onns è cunter ina pli auta vegliadetgna da renta. Quai mussa ina retschertga dal revisur Deloitte che ha preschentà il zercladur differents scenaris a la populaziun per auzar la vegliadetgna da renta. Tranter auter in augment da la vegliadetgna da renta per dunnas sin 65 onns, ed ina vegliadetgna da renta per umens sin 66 sco era auzar la vegliadetgna da renta pass per pass per um e dunna sin 67 onns. Quai per adattar la vegliadetgna a las aspectativas da vita. Dumandà han ins persunas en tuttas regiuns da la Svizra.

Dunnas cunter augment

Cun questa proposta èn tenor la retschertga 60% dals umens d’accord, dentant sulettamain 32% da las dunnas. Totalmain han 47% da las persunas detg gea. En Svizra franzosa eran 24% per in augment da la vegliadetgna da renta per dunnas, en la Svizra tudestga 55%.

Autras variantas refusadas anc pli cler

Auters scenaris sco per exempel in augment da la vegliadetgna per ils umens sin 66 èn vegnids refusads anc pli cler. Ad in augment da la renta sin 66 onns per umens han 35% dals umens detg gea e 30% da las dunnas. Ad in augment pass per pass per um e dunna sin 67 per adattar la vegliadetgna a las aspectativas da vita han be 14% da las dunnas detg gea e 30% dals umens.

Ord l'archiv

RR novitads 10:00