Sch'i dat uffants lura vegn maridà. Quai vala per passa 90% da tut ils pèrs che han ensemen uffants. Las cifras davart famiglias e generaziuns che l’Uffizi federal da statistica (BfS) ha publitgà, mussan dentant era ch'i dat differenzas tranter las gruppas da vegliadetgna. Pli giuvens ch'ils pèrs èn e pli pauc che quella regla vala. Passa 15% dals pèrs tranter 25 e 34 onns che han uffants n’èn per exempel betg maridads.
Giavisch vs. realitad
In auter aspect interessant è la dumonda, sch'ins vul uffants e sche gea quants. Bun dus terzs da las persunas en la vegliadetgna tranter 20 e 29 onns che han nagins uffants han respundì ch'els avessan gugent dus uffants. La realitad è dentant in'autra. In sguard sin las persunas ch'èn 30 onns pli veglias mussa che mo circa 40% han dus uffants. Bun in quart dad ellas han nagins uffants. Quai che dat en egl: Dunnas bain scoladas han pli savens nagins uffants che dunnas cun ina scolaziun secundara u obligatorica.
Èn ils uffants dentant ina giada qua èsi era da guardar dad els. E qua mussan las cifras dal BfS che passa dus terzs da las chasadas cun uffants dovran agid extern. Il pli savens èn quai tat e tatta u vischins ed amis. Ina gronda part, passa in terz da las chasadas cun uffants sut 13 onns profiteschan dentant era da canortas u autras offertas ordaifer la scola.
Canortas pli dumandadas en Svizra franzosa
Tut tenor regiun linguistica è quai dentant pulit different. En Svizra franzosa profiteschan bun la mesadad dals servetschs da canortas e sumegliantas instituziuns. En Svizra tudestga in terz ed en la Svizra italofona strusch in quart da las chasadas cun uffants sut 13 onns.
Sa midada è la tenuta da la populaziun envers mammas che na stattan betg mo a chasa mabain che van era a lavurar. Eran avant 25 onns anc bun la mesadad da las dunnas da l'opiniun ch'uffants pitschens pateschian, sche la mamma va a lavurar èn quai oz mo pli bun in quart che pensan quai. Il medem trend è era d’observar tar ils umens.
RR actualitad 12:00