Siglir tar il cuntegn

Header

cuntegn

Retschertga da votaziuns Gronda differenza tranter umens e dunnas tar la refurma da l'AVS

Ils 25 da settember voteschan Svizras e Svizzers davart quatter fatschentas.

Sch'i fiss vegnì votà gia ils 8 d'avust, fissan las duas fatschentas da la refurma da l'AVS ed er l'iniziativa cunter l'allevament intensiv vegnidas approvadas. L'abolir parzialmain la taglia anticipada avess fatg naufragi.

audio
Votaziuns 25 da settember: Emprima retschertga da GFS
ord Actualitad dals 19.08.2022.
laschar ir. Durada: 3 minutas 19 Secundas.

Refurma da l'AVS fiss approvada

Tar la refurma da l'AVS vai per duas fatschentas separadas ch'èn da votar. Sche ina vegn refusada, va l'entira refurma per stabilisar las finanzas da l'Assicuranza da vegls e survivents da l'aua giu. En ina vai per auzar la vegliadetgna da pensiun da las dunnas sco er per flexibilisar il mument da d'ir en pensiun per umens e dunnas e tar la segunda vai per auzar la taglia sin la plivalur. Sch'i fiss vegnì votà gia l'entschatta avust, avess la populaziun ditg cleramain Gea ad omaduas fatschentas da l'AVS 21.

Total 64% dals Svizzers e da las Svizras avessan ditg Gea d'auzar la vegliadetgna da pensiun da las dunnas. 33% fissan stads encunter. Be 3% n'han anc fatg nagin'opiniun en chaussa.

purtret da petta che mussa co las vuschs èn repartidas exct.
Legenda: RTR Grafica

Tar la taglia sin la plivalur che duai vegnir auzada per generar dapli entradas guarda quai ora fitg sumegliant. 65% da las Svizras ed ils Svizzers avessan approvà la fatschenta. 29% da la populaziun avess ditg Na.

purtret d'ina petta che mussa co las vuschs èn repartidas tar la taglia sin plivalur
Legenda: RTR Grafica

Gronda differenza tranter umens e dunnas

La retschertga mussa dentant ina gronda discrepanza tranter las dunnas ed ils umens. Fertant che 74% dals umens avessan vuschà cun in Gea, èn quai be 52% da las dunnas. Tar l'auzar la taglia sin plivalur è la differenza bler pli pitschna (umens 68%, dunnas 64%).

duas pitgas che mussan la differenza co umens e dunnas avessan votà tar l'auzar la vegliadetgna da pensiun.
Legenda: RTR Grafica

Er mussa la retschertga grondas differenzas tranter la Svizra tudestga e la Svizra franzosa e taliana. En Svizra tudestga survegnan omaduas fatschentas pli u main tuttina bleras vuschs. En las autras regiuns survegn dentant l'auzar la vegliadetgna da pensiun per las dunnas pli pauc consentiment che la taglia sin la plivalur. Sur tut ora schessan però tuttina tuttas regiuns Gea a las duas fatschentas

Malgrà il cler Gea han tar questas duas fatschentas actualmain ils arguments encunter ina gronda paisa. Qua vai per ils arguments che la refurma vegnia purtada or sin il dies da las dunnas, che be persunas bainstantas pudessan insumma sa prestar d'ir pli baud en pensiun e che la refurma saja malgista, perquai che tuts stoppian pajar dapli taglia sin la plivalur, ma las prestaziuns vegnian scursanidas. La campagna dal cumbat da votaziun ha pir cumenzà e po uschia anc influenzar l'opiniun dals votants e las votantas. Sin basa dal grond avantatg da la vart dal Gea, pari dentant pli pauc probabel che la refurma vegn anc refusada. En il cas normal s'avischina l'intenziun da votar da la populaziun, pli ditg che la campagna dura, pli ferm a la proposta dal Cussegl federal e dal parlament, vul dir al Gea.

Blers anc indecis tar la taglia anticipada

L'entschatta avust avessan 49% vuschà per abolir parzialmain la taglia anticipada e 35% encunter. 16% dals participants e las participantas èn anc stadas indecis. Quai èn relativamain bleras persunas, sch'ins resguarda il mument che l'enquista è vegnida fatga. Cun abolir parzialman la taglia anticipada (sin obligaziuns) vul il Cussegl federel en emprema lingia mantegnair attractiv la Svizra sco plazza economica. En blers auters pajais na datti numnadamain betg questa taglia.

Diagram da petta mussa las relaziuns tratner las vuschs da Gea e Na.
Legenda: RTR Grafica

Pir 44% dals participants han gia in'opiniun fixada davart la taglia anticipada. Quai munta ch'i po anc dar in grond moviment en il decurs da la campagna. Actualmain è l'opiniun influenzada ferm da las partidas politicas. Quai munta che participants affins per la Verda e la Partida socialdemocratica che ha prendì il referendum encunter questa midada, avessan refusà la fatschenta. Aderents ed aderentas da las autras partidas avessan (per part stgars) approvà quella.

Dasper la simpatia per las partidas èn las entradas per chasada er in factur per la decisiun: Pli autas che las entradas èn e pli blers che avessan approvà la fatschenta.

Stretg Gea – ma iniziativas perdan normalmain consentiment

L'entschatta avust avessan 51% dals participants e participantas a la retschertga ditg Gea a l'iniziativa cunter l'allevament intensiv. L'iniziativa vul fixar en la Constituziun federala da tegnair animals da niz cun dignitad, tranter auter cun reglas per il plaz en stalla, l'access en il liber u la meztga. 46% vulan dir Na. 33% da las persunas èn gia cler per e 32% èn gia cler encunter l'iniziativa. Quai correspunda a 65% dals participants ch'èn gia segirs. Uschia ha fitg blera glieud gia furmà sia opiniun davart la fatschenta.

Diagram da petta che mussa co las vuschs èn repartidas.
Legenda: RTR Grafica

En il cas normal adatteschan votantas e votants durant il temp da la campagna lur opiniun a la proposta dal Cussegl federal ed il parlament. Sche quai capita er qua, è la probabilitad gronda che l'iniziativa vegn refusada ils 25 da settember. Plinavant pudess questa iniziativa agrara avair ina greva vita sch'i va per survegnir la maioritad dals chantuns. Anc èsi bain memia baud per dir cler tge che lez din, dentant è da vesair ch'ils chantuns champesters da la Svizra tudestga e franzosa èn gia critics. Sche la polarisaziun sa ferma, sco quai ch'i vegn spetgà durant la campagna, vegnan ils chantuns conservativs da la Svizra tudestga a votar Na.

Detagls da la retschertga

Avrir la box Serrar la box

L'emprima unda da la retschertga ha l'institut da perscrutaziun gfs.berna fatg tranter ils 29 da fanadur ed ils 15 d'avust 2022. Sa participadas èn 12'015 persunas cun dretg da vuschar. La quota da sbagls munta a +/- 2.8 puncts procentuals.

Dossier online

Avrir la box Serrar la box
Legenda: Grafica RTR

Sin in clic tut davart las votaziuns dals 25 da settember.

RTR novitads 06:00

Artitgels legids il pli savens