Siglir tar il cuntegn

Header

cuntegn

Svizra Resuns suenter la terrada da la PPS

L’iniziativa «Per il repatriament effectiv d’esters criminals» da la PPS ha polarisà la Svizra. Il di suenter las votaziuns – e suenter il cler «Na» a l’iniziativa – datti reacziun da tuttas varts.

In «segn da madirezza» numna la «Neue Zürcher Zeitung» il naufragi da l'iniziativa per il repatriament effectiv

audio
Bunura: Repatriament effectiv - valitaziun da la mobilisaziun cun Georg Lutz
ord Actualitad dals 29.02.2016.
laschar ir. Durada: 2 minutas 51 Secundas.

Il «Tagesanzeiger» scriva ch'il na a l'iniziativa saja in «success remartgabel da la populaziun civila». Nagin pajais raschunaivel fixeschia en la constituziun in catalog da delicts acribic e degradeschia ses derschaders a famegls.

Il «Blick» scriva che la decisiun midia la politica e fetschia bain a noss pajais.

Eventualmain «staila crudanta» empè da «mument magic»

Auter tuna quai en la «Basler Zeitung». Gudagnà n’haja betg la societad civila, sco intgins dals victurs sa numnian. Il resultat demussia plitost, che la maioritad dals votants hajan tschertezza e fidanza en la realisaziun da l’iniziativa per il repatriament, davart la quala il parlament aveva decis.

Il resultat saja be ina victoria per la Svizra liberala, sch’ils umans e lur possess en la Svizra vegnian protegids meglier.

La «Nordwestschweiz» dubita ch’il resultat cunter l’iniziativa da la PPS - che vegn titulà sco «mument magic» - pudess esser stà be ina «staila crudanta». L’opposiziun engaschada ch’è sa mussada na saja tuttavia betg in novum. Il nov dals adversaris saja lur colliaziun digitala.

Pressa europeica

  • Er en noss pajais vischinants ha la decisiun cunter l’iniziativa bittà undas. La Partida populara svizra haja stendì memia fitg la corda e stoppia perquai pajar ussa, uschia il tenor en bleras gasettas europeicas.
  • Tenor la gasetta tudestga «Die Welt» ha la PPS calculà fallà e fatg il quint senza l'ustier. La «Süddeutsche Zeitung» discurra d'ina pitschnna sensaziun: Ils Svizzers hajan realisà che lur democrazia vegnia attatgada e sajan sa dustads a moda consequenta. I valia la paina d'argumentar. Ils populists n'hajan nagin abunament sin la voluntad dal pievel.
  • Tenor la gasetta franzosa «Libération» è il na a l'iniziativa ina sconfitta pitra per la PPS. Cun il tema migraziun haja la partida fin ussa adina pudì far puncts. Ed en la medema crenna dat era la gasetta spagnola «El País». Nagin tema èn las votaziuns d'ier entant en las gasettas talianas.

Era prendì posiziun tar il na a l'iniziativa per il repatriament effectiv ha il minister da giustia tudestg Heiko Maas:

Edward Snowden - l'um ch'aveva revelà l'affera enturn il servetsch secret american NSA - è losch da la Svizra. La democrazia directa haja battì la xenofobia, uschia Snowden:

RR novitads 06:00

Artitgels legids il pli savens